Renault R35
Lo Renault R35 es un carri leugier d'infantariá francés desvolopat durant leis ans 1930. Produch a 1 540 exemplaris entre 1936 e 1940, èra destinat ai batalhons blindats encargats de sostenir l'accion de l'infantariá[1]. Participèt a la Segonda Guèrra Mondiala e a la Premiera Guèrra Araboisraeliana.
La concepcion dau R35 èra una mescla d'evolucions modèrnas e de trachs pus tradicionaus inspirats per lo Renault FT-17 de la Premiera Guèrra Mondiala. Lo Renault R35 foguèt ansin dotat d'un blindatge avans de 43 mm que li donava una proteccion fòrça eficaça còntra la màger part dei municions anticarri utilizadas en 1940. Pasmens, lo canon de 37 mm que constituissiá l'armament principau èra tròp feble[2]. De mai, problema present sus la quasi totalitat dei carris francés dau periòde, l'equipatge èra format d'un conductor e d'un cap de carri que deviá guidar lo veïcul, observar l'environament, comunicar amb lo rèsta de son unitat e s'ocupar dau canon. L'autonòmia de 140 km èra tanben febla. Per resòuvre aquelei problemas, foguèt desvolopat lo Renault R40, una version equipada d'un canon lòng pus poderós.
Au 1èr abriu de 1940, 1 063 R35 èran disponibles sus lo territòri francés. Mostrèron una bòna resisténcia ai tirs alemands qu'avián de dificultats importantas per lei destrurre a de distàncias superioras a 300 m. Pasmens, d'un biais generau, lei R35 èran pauc adaptats a la guèrra de movement menada per leis Alemands en causa de son autonòmia tròp febla. De mai, foguèron sovent engatjats dins de condicions pauc favorablas (inferioritat numerica, avitalhament malaisat...).
843 R35 foguèron capturats per la Wehrmacht que ne'n donèt una partida a Bulgaria e a Itàlia. Lo rèsta foguèt transformat en tractor d'artilhariá, en transpòrt de municions ò en caçaire de carris. Quauquei torèlas foguèron tanben utilizadas per equipar de fortificacions fixas. Pasmens, tre 1941, lei performàncias dau R35 èran vengudas insufisentas per li permetre de combatre lei carris pus modèrnes coma lo T-34 sovietic. Après 1945, França laissèt de R35 a Liban e a Siria. Aquelei carris participèron a la Premiera Guèrra Araboisraeliana onte obtenguèron pauc de resultats.
Liames intèrnes
[modificar | Modificar lo còdi]Bibliografia
[modificar | Modificar lo còdi]- (fr) Pascal Danjou, « Le char Renault R35 », Tank & military vehicles, n° 10, febrier-març de 2013.
- (fr) Rémi Fontbonne, « La maintenance des engins blindés français en 1940 », Histoire de Guerre, n° 38, julhet-aost de 2003, pp. 56-65.
Nòtas e referéncias
[modificar | Modificar lo còdi]- ↑ 240 foguèron exportats vèrs Polonha, Romania, Turquia e Iogoslavia.
- ↑ Aqueu canon èra completat per una mitralhièra de 7,5 mm.