Ofensiva de Praga
L’Ofensiva de Praga es una ofensiva menada dau 6 au 11 de mai de 1945 per l'Union Sovietica e seis aliats còntra lei fòrças alemandas estacionadas dins la mitat occidentala de Checoslovaquia. Son objectiu principau èra la presa de Praga e, en despiech de la capitulacion dau IIIen Reich signat lo 8 de mai, contunièt fins au 11. Lei tropas sovieticas alinhavan 1,77 milions d'òmes (completats per 250 000 òmes d'autrei país[1] dirigits per Ivan Konev. Foguèron sostengudas per l'insureccion de la vila de Praga. En fàcia, leis Alemands dispausavan de 1,03 a 1,08 milions d'òmes comandats per Ferdinand Schörner e Lothar Rendulic.
L'ataca comencèt lo 6 de mai e foguèt inicialament ajudada per d'atacas estatsunidencas a l'oèst de Checoslovaquia per empachar l'arribada de renfòrç. Dins aquò, lei tropas alemandas mancavan d'avitalhament e d'equipaments e, tre lo 6, de miliers de soudats capitulèron. De mai, lo 7, comencèt l'insureccion de Praga e lei soudats alemands assaièron subretot de combatre vèrs l'oèst per se rendre ais Aliats. Après la signatura de la capitulacion de Berlin lo 8, aqueu movement se renforcèt e tota la defensa alemanda s'afondrèt. Entre lo 9 e lo 11, lei Sovietics avancèron en direccion dei posicions aliadas mentre que lei militars e civius alemands èran a s'enfugir. En causa de la velocitat de l'avançada de l'Armada Roja e dau secutament organizat per lei partisans chècs, la màger part deis unitats de la Wehrmacht presentas sus lo territòri checoslovac foguèron capturadas[2].
L'operacion s'acabèt per una victòria totala dei Sovietics que liberèron la totalitat de Checoslovaquia e capturèron la màger part dei tropas alemandas. Au finau, leis Alemands perdiguèron 50 000 tuats e bleçats a au mens 800 000 presoniers. En cambi, lei pèrdas de l'URSS e de seis aliats foguèron leugierament superioras a 52 000 tuats e bleçats.
Liames intèrnes
[modificar | Modificar lo còdi]Bibliografia
[modificar | Modificar lo còdi]- (en) David M. Glantz e Jonathan House, When Titans Clashed: How the Red Army Stopped Hitler, University Press of Kansas, 1995.
- (en) Earl F. Ziemke, Stalingrad to Berlin: The German defeat in the East, Dorset Press, 1990.
Nòtas e referéncias
[modificar | Modificar lo còdi]- ↑ Principalament Romania, Polonha e Checoslovaquia.
- ↑ Pasmens, totei lei combats s'acabèron pas lo 11 car certaneis sosunitats assaièron totjorn de se dirigir vèrs l'oèst. Per exemple, la division SS Das Reich capitulèt lo 12 après la batalha de Slivice.