Najd
Nejd ò Najd es una region dau centre de la Peninsula Aràbia. Situada a una altitud compresa entre 762 e 1 525 m, es principalament ocupada per un platèu desertic. D'oasís i an permés lo desvolopament de vilatges e de vilas coma Riyad (4,4 milions d'abitants en 2010) ò Buraydah (614 000 abitants).
Istoricament poblada per de tribús nomadas, Nejd èra una fònt de trèbols en causa deis incursions menadas per lei cavaliers d'aquelei tribús en direccion dei regions pus ricas. Ansin, lei poissanças dominantas d'Orient Mejan i mandèron regularament d'expedicions per la pacificar. Pasmens, aqueu contraròtle èra sovent unicament nominau. Dins lo corrent dau sègle XVIII, la region venguèt lo còr de la poissança de la dinastia saudita qu'i fondèt un premier estat en 1744. Maugrat una desfacha còntra leis Otomans en 1818, aqueu reiaume capitèt de subreviure en Nejd. Aprofichant lo declin otoman e la Premiera Guèrra Mondiala, se renforcèt a partir de 1902. Conquistèt pauc a pauc lo rèsta de la peninsula e venguèt la basa de l'Arabia Saudita modèrna.