Columbita
La columbita (ò niobita) es un minerau negre ò negre brun amb, per certanei varietats, de rebats rogencs. Sa duretat es egala a 6 e sa densitat a 5,2. Es constituïda d'oxid de niòbi e de fèrre (FeNb2O6) que pòu formar de cristaus prismatics pichons. Pasmens, sa forma pus frequenta es aquela d'agremats massís. Son esclat es submetallic. Quimicament, es infusibla e solubla dins l'acid sulfuric. Presenta pas de fluorescéncia.
Dins la natura, la columbita se forma generalament dins de venas pegmatiticas, especialament aquelei que contènon de concentracions importantas de silicats e de fosfats de liti. Pòu tanben èsser concentrada dins de depaus arenós. Es generalament associada amb l'espodumèn, la lepidolita, lo beril, lo corindon, la criolita e lo qüars. Es utilizada coma minerau per la produccion de niòbi e de tantal (que pòu remplaçar lo niòbi dins son estructura).