Eth canton de Castèthnau de Manhoac qu'ei ua anciana division administrativa de Manhoac en Gasconha, situada dens eth arrondiment de Tarba, eth departament deths Hauts Pirenèus e era region de Miègjorn-Pirenèus, ara d'Occitània. 28 d'eras 29 comunas que son dempuèi 2015 dens eth canton deths Costalats (burèu centralizator Tria de Baïsa) e tanben dens era comunautat de comunas deu País de Tria e deu Manhoac; Arnèr qu'ei dens eth canton dera Varossa (burèu centralizator Lanamesa) e dens era comunautat de comunas deth Plan de Lanamesa Nèsta-Baronias-Baïsa. Era lenga autoctòna qu'ei eth occitan gascon. Ua partida majoritària deth canton qu'utiliza eth article pirenenc (marcat eth); eth limit qu'ei esquematicament ua linha SO-NE. Dens ua partida sud o sud-oèst, -D- intervocalic d'origina que mia (o qu'a tornat) a -d : SUDARE > sudar (marcat d o siquenon s); sus ua partida au mens, que i a tanben d vengut de -c e, i- e de -ty-.
