Annie Cordy

La famosa cantaira belga Annie Cordy, aquí en 1961

Léonie Cooreman, dicha Annie Cordy, nascuda còsta Brussèlas lo 16 de junh de 1928 a Laeken (Belgica) e mòrta en Occitània (mai precisament : en Provença) ont demorava dempuèi 2013 lo 4 de setembre de 2020 a Valàuria (França), foguèt una cantaira francofòna bèlga fòrça populara, tanben actritz.

Fòrça prolifica, a enregistrat mai de sèt cents cançons generalament risolièras (La bonne du curé, la mai coneguda de son repertòri, Six roses, Frida oum papa...) o d'estil festiu (Tata Yoyo, Cho Ka Ka O...). A participat a un vintenat de comèdias musicalas e d'operetas. A tanben jogat dins una quarantena de films, un trentenat de serias e telefilms, e tanben jogat la comèdia dins un desenat de pèças de teatre, e balhat quasi dètz mila galàs.

Demest sas capitadas popularas, se pòt citar entre autras Cigarettes, Whisky et P'tites Pépées (1957), Hello le soleil brille (1958, inspirat d'una musica del filme Le Pont de la rivière Kwaï), Salade de fruits (una represa de Bourvil, en 1959), sa represa de Un clair de lune à Maubeuge (1962), Six roses (1964), sa version francesa de Hello, Dolly (1972), La bonne du curé (fin 1974), sa version francesa de Frida oum papa (fin 1975, tròç de bal museta checoslovaca, compausat en 1927 per Jaromír Vejvoda e popularizat per l'alemand Will Glahé), Ça ira mieux demain (1976), Tata Yoyo (1981) o encara Cho Ka Ka O (1985).

Es estada anoblida en 2005 ambe lo títol de barona.