Rosemarie Köhn
Rosemarie Köhn | |
![]() | |
Statsborgarskap | Noreg |
Fødd | 20. oktober 1939 Rathenow |
Død |
30. oktober 2022 (83 år) |
Yrke | prest |
Religion | Den norske kyrkja |
Ektefelle | Susanne Sønderbo |
Partnar | Susanne Sønderbo |
Rosemarie Köhn på Commons |
Rosemarie Köhn (20. oktober 1939–30. oktober 2022[1]) var ein tyskfødd norsk teolog og tidlegare biskop av Hamar. Ho var den fyrste kvinnelege biskopen i Noreg, og den andre i verda i det lutherske kyrkjesamfunnet, etter Maria Jepsen.
Akademisk karriere
[endre | endre wikiteksten]Köhn, som hadde tysk far og norsk mor, vart fødd i Rathenow ved Berlin. Ho kom til Noreg i slutten av 1940-åra. Her studerte ho teologi etter artium. I 1966 fekk ho graden cand. theol., og i 1969 vart ho ordinert til prest av biskop Per Lønning.
Rosemarie Köhn arbeidde som hjelpelærar i hebraisk ved Universitetet i Oslo frå 1967 til 1977. Her skreiv ho læreboka Hebraisk Grammatikk (1971), som framleis blir brukt til hebraiskstudia ved norske universitet og høgskular. Samstundes var Köhn stipendiat i gamaltestamentleg teologi fram til 1975. Ho vart tilsett som universitetslektor i bibelfag ved Institutt for religionshistorie og kristendomskunnskap i 1976, og underviste òg ved det integrerte praktikumet innan sjelesorg, homiletikk og pastorallære, og i prinsipiell etikk ved institutt for sjukepleievitskap. Ho var avdelingsbestyrar ved avd. B, Institutt for religionshistorie og kristendomskunnskap i åtte år, og leidde forskingsprosjektet Presterollen 1986-1989. I 1989 vart ho rektor ved Det praktisk-teologiske seminaret ved Universitetet i Oslo.
Biskop Köhn
[endre | endre wikiteksten]Rosemarie Köhn vart utnemnd til biskop i Hamar av kongen i statsråd i 1993. Köhn har vore rekna til den liberale fløya i kyrkja, og Köhn har vore kontroversiell i samband med vigslinga av homofile prestar. Eit godt døme er den såkalla Siri Sunde-saka, som gjorde at Köhn vart den desidert mest namngjetne norske biskopen på 1990-talet.
Rosemarie Köhn vart i 2004 utnemnd av Kong Harald V til kommandør av Den Kgl. Norske St. Olavs Orden.
13. januar 2006 varsla biskopen at ho kom til å trekkje seg frå stillinga som biskop i oktober same året. Årsaka til dette var at Köhn hadde hatt høgt blodtrykk og fleire små hjerneslag. Rosemarie Köhn gjekk av 1. november 2007.
Utgjevingar
[endre | endre wikiteksten]- Hebraisk Grammatikk. Oslo: Universitetsforlaget, 1971
- Presterollen. 1989
- Håpstreet. Oslo: Pax forlag, 2002
- Gode Gud? (saman med Susanne Sønderbo). Oslo: Pax forlag, 2003
Kjelder
[endre | endre wikiteksten]- ↑ Waaler, Ingrid Emilie (30. oktober 2022). «Rosemarie Köhn er død». NRK (på norsk bokmål). Henta 30. oktober 2022.