Nesodden kommune

	Nesodden kommune
	kommune
	Kommunevåpen
	Kommunevåpen
Land	Noreg
Fylke	Akershus
Adm.senter	Nesoddtangen
Areal	61,46 km²
• land	60,74 km²
• vatn	0,72 km²
Folketal	20 521 (1. januar 2024)
Målform	bokmål
Ordførar	Cathrine Kjenner Forsland (Ap)
Kommunenr.	3212
	; Nesodden; 59°48′31″N 10°39′20″E / 59.808611111111°N 10.655555555556°E
	Kart som viser Nesodden kommune. Kart som viser Nesodden kommune.
	Wikimedia Commons: Nesodden
	Nettstad: www.nesodden.kommune.no

Nesodden er ein kommune i Akershus fylke. Nesodden er òg namnet på den halvøya som kommunen ligg på. Halvøya har Indre Oslofjord (Oslofjorden) på vestsida og Bunnefjorden på austsida, og grensene mot grannekommunane Frogn, Asker, Bærum, Oslo og Nordre Follo går i desse fjordområda. I sør, der kommunen er landfast, grensar han òg til Frogn kommune.

Kring ¾ av flatevidda er skog og utmark. Innbyggjarane har difor eit godt tilbod av friluftsområde både på land og ved sjøen. 86 % av innbyggjarane bur i tettbygde strok. I tillegg er det mange fritidseigedomar og hytter i kommunen.

Nesoddtangen (Tangen/Tangenbyen) ligg heilt nord i kommunen. Bjørnemyr, Fjellstrand, Spro og Fagerstrand ligg på vestsida med flott utsikt over Oslofjorden. På austsida er det nesten samanhengjande busetnad frå Tangen via Oksval, Ursvik, Hellvik, og Berger til Jaer og Blylaget.

Saman med Enebakk, Frogn, Oppegård, Ski, Vestby og Ås utgjer Nesodden den delen av Akershus som vert kalla Follo.

Nesodden og Oppegård var tidlegare ein kommune, men vanskeleg reiseveg mellom Oppegård og Nesodden tvinga fram ei deling. I 1915 vart Oppegård skild ut som eigen kommune.

På Nesodden finst fleire område med eikeskog. Dette er truleg dei nordlegaste store eikeskogane på Austlandet og i Noreg. Dei lokale namna Eklund og Ekelund kjem av eikeskogen.

Kommunikasjonar

Medan det er kring 40 km til Oslo langs landevegen, er det berre 7 km over fjorden. Ei reise med moderne snøggbåt tek kring eit kvarter. Det er båtsamband med mange avgangar. Nesodden har som ein av få kommunar på Austlandet svært mange båtpendlarar.

A/S Nesodden-Bundefjord Dampskipsselskap som dreiv sambandet fram til 2009 hadde 2,4 millionar passasjerar årleg på ruta frå Nesoddtangen til Aker Brygge. I tillegg vert det drive ei rute til Lysaker med 200.000 reisande. I 2009 tok Tide over konsesjonen på sambandet, til dels med nye båtar. No vert sambandet drive av ferjeselskapet Norled AS.

Næring

Jord-, skogbruk og fiske var tidlegare dei vanlege næringsvegane på Nesodden. I tillegg dreiv ein med saltbrenning og isdrift. Saltbrenning tyder innkoking av sjøvatn. Grunnlaget for dette låg i at vatnet i Bunnefjorden hadde spesielt høgt saltinnhald. I tillegg var tilgangen på ved og torv til brensle god. Frå kring 1850 skar ein is frå vatn og tjern vinterstid. I åra frå 1895 til 1905 låg den årlege produksjonen på heile 45.000 tonn. I dag er det berre 0,6 % av folkesetnaden som er sysselsett i primærnæringane. 87 % arbeider i tertiærnæringar.

Bakgrunnsstoff

Nesodden kommune (Offisiell nettstad)
Nesodden Historielag
Kulturminne på Nesodden på Kulturnett Akershus