Ilona Slupianek

Ilona Slupianek
Statsborgarskap	Tyskland, Den tyske demokratiske republikken
Fødd	24. september 1956 (68 år) Demmin
Idrett	friidrett
Tok del i	Sommar-OL 1980, Sommar-OL 1976
Utmerkingar	Fedrelandets fortjenstorden i gull

Ilona Slupianek i 1977

Ilona Slupianek, fødd Ilona Schoknecht, (fødd 24. september 1956) er ein tysk tidlegare friidrettsutøvar frå Demmin som representerte Aust-Tyskland i kulestøyt. Ho vart europameister i 1978 og 1982, og vann i mellomtida gullmedaljen i øvinga under OL 1980 i Moskva. Hennar personbeste, 22,45 meter, var verdsrekord 1980-84.

Aktiv

Doping

Ilona Schoknecht vann kulestøyt i junior-EM 1973. Ho vart så nummer fem i Sommar-OL 1976, før ho i 1977 vann kuletevlinga under Europacupen for landslag i Helsinki. Her vart ho teken for bruk av det forbodne stoffet nandrolon og utestengd i eitt år frå friidrettsbana.

Verdseinar

Utestenginga tok slutt to dagar før kulestøyt stod på programmet ved friidretts-EM 1978 i Praha. Ilona Slupianek sette då meisterskapsrekord med 21,41 m og vart suveren europameister framom tsjekkoslovakiske Helena Fibingerová, og med hennar eiga landskvinne Margitta Droese på bronseplass.

Den 11. mai 1980 sette Slupianek ny verdsrekord i kulestøyt med 22,45 meter under eit stemne i Potsdam, ein rekord som stod i fire år, til dess Natalja Lisovskaja forbetra den. Framleis i 2016 er Slupianek nummer to på verdstatistikken i kulestøyt for kvinner. Under dei olympiske leikane 1980 i Moskva støytte Slupianek heile 22,41 m og vart olympisk meister, ho nådde nesten ein meter lengre enn toaren, Svetlana Kratjevskaja frå Sovjetunionen.

Ved EM 1982 i Aten forsvarte Slupianek EM-tittelen, som i forrige EM med Helena Fibingerová på andreplass. Året etter enda ho på bronseplass, etter nettopp Fibingerová og si eiga landskvinne, Helma Knorscheidt.

Etter som Aust-Tyskland boikotta Sommar-OL 1984 i Los Angeles, deltok ho ikkje i leikane. Ho gifta seg med kulestøytaren Hartmut Briesenick og vart mor til to born. Sommaren 1988 prøvde ho fånyttes å kvalifisere seg til Sommar-OL 1988 i Seoul.

Medaljar og plasseringar i internasjonale meisterskap

• OL 1976 i Montreal: Nr 5 – 20,54 m
• EM 1978 i Praha: Gullmedalje 21,41 m, framom Helena Fibingerová (20,86 m)
• OL 1980 i Moskva: Gullmedalje 22,41 m, framom Svetlana Kratsjevskaja (21,42 m)
• EM 1982 i Aten: Gullmedalje 21,59 m, framom Helena Fibingerová (20,94 m)
• VM 1983 i Helsinki: Bronsemedalje 20,56 m, framom Nunu Abasjidze (20,55 m)

Kjelder

• Denne artikkelen bygger på «Ilona Slupianek» frå Wikipedia på tysk, den 18. august 2016.