Ilía

Periferieininga Ilía Περιφερειακή ενότητα Ηλείας
Periferi	Vest-Hellas
Hovudstad	Pýrgos
Folketal	149 896 (2021)
Areal	2 618 km² Rangering 22.
Folketettleik	57/km²
Kommunar	7
Postnummer	27x xx
Retningsnummer	262x0
Bilnummer	HA
Heimeside	www.nailias.gr

Periferieininga Ilía (gresk Περιφερειακή ενότητα Ηλείας, Periferiakí enótita Ilías) er ei periferieining i Hellas i periferien Vest-Hellas. Hovudstaden i periferieiningα er Pýrgos. Periferieininga ligg vest på Peloponnes.

Administrativ inndeling

Tidlegare var Ilía eit prefektur. Frå 2011 er periferieininga delt inn i sju kommunar.

Periferieining	Kommune	Tidlegare kommune
Ilía	Andravída-Kyllíni	Andravída
		Vouprasía
		Kástro-Kyllíni
		Lekhená
	Piniós	Gastoúni
		Vartholomió
		Traganó
	Pýrgos	Pýrgos
		Vólakas
		Iárdanos
		Oléni
	Ílida	Amaliáda
		Pinía
	Antikke Olymbía	Antikke Olymbía
		Lámbia
		Lasióna
		Folói
	Andrítsena-Kréstena	Andrítsena
		Alífira
		Skilloúnda
	Zakháro	Zakháro
		Figalía

Geografi

Kysten av Ilía har 120 km med sandstrender. Den lengste elva i periferieininga er Alfiós. Andre elvar er Erýmanthos og Néda, som dannar grensa mellom Ilía og Messinía.

I sør ligg fjellkjedene Móvri (Μόβρη), Dívri (Δίβρί), Mínthi (Μίνθη) og fleire.

Ilía grensar til Messinía i sør, Arkadía i søraust og Akhaía i nordaust. Det joniske havet ligg i nord og vest. Øya Zákynthos ligg eit stykke vest for Ilía.

Historie

I 776 fvt. vart dei første olympiske leikane halde i Olympia i Ilía. Desse leikane varte inn i Romarriket og Austromarriket. På 200- og 300-talet herja gotarar, slavarar og vandalar i området. På 1000- til 1200-talet bygde frankarane festningsverk i området for å hindre åtak frå nord. I 1204 vart fyrstedømet Akhia oppretta og Ilía vart ein del av dette dei neste 256 åra. I 1460 vart fyrstedømet og Ilía erobra av Det osmanske riket. Tida under osmanarane varte fram til den greske sjølvstendekrigen i 1821, med korte avbrot då Venezia erobra område på Peloponnes.

Ilía vart først ein del av det større prefekturet Akhaía-Ilía. Dei vart skild frå kvarandre og kom saman igjen, med sidan 1934 har dei vore fråskild.

I august 2007 vart Ilía råka av enorme skogbrannar, som førte til fleire titals dødsfall og enorme miljømessige og økonomiske øydeleggingar. Totalt omkom 45 menneske i prefekturet, men over 100 000 vart råka på ein eller annan måte. 3 500 vart heimelause, 25 000 dyr døydde og 8 500 hektar med skog brann ned, i tillegg til 2 300 hektar med jordbruksland.

Byar og tettstader

Dei største byane og tettstadene i periferieininga er:

Tettstad	Kommune	Folketal 2011	Folketal 2021
Pýrgos	Pýrgos	24 359	25 151
Amaliáda	Ílida	16 763	16 841
Gastoúni	Piniós	7 485	7 683
Néa Manoláda	Andravída-Kyllíni	2 006	3 696
Andravída	Andravída-Kyllíni	3 981	3 110
Vartholomió	Piniós	3 603	3 979
Zakháro	Zakháro	3 145	2 871
Lekhená	Andravída-Kyllíni	2 641	2 720
Traganó	Piniós	2 509	2 947
Várda	Andravída-Kyllíni	2 291	2 762
Kréstena	Andrítsena-Kréstena	1 864	1 642
Makrísia	Andrítsena-Kréstena	1 718	1 564
Epitálio	Pýrgos	1 469	1 239
Kavásilas	Piniós	1 252	1 231
Savália	Ílida	1 206	1 101
Myrsíni	Andravída-Kyllíni	1 135	1 265
Manolás	Andravída-Kyllíni	844	1 202
Varvásena	Pýrgos	1 107	980

Kjelder

• Denne artikkelen bygger på «Ilia Prefecture» frå Wikipedia på engelsk, den 7. september 2007.