Woltmershusen (Stadtdeel)

Stadtdeel vun Bremen Woltmershusen

Wat to seggen is		Rang
Flach:	5,39 km²	19/23
Inwahners:	13705	17/23
Inwahnerdicht:	2543 Inwohners/km²	12/23
Andeel Butenlänners:	11,5 %	12/23
Arbeitslosenquoot:	23,8 %	5/23
Wannehr:	Midde 2005
Ortsdelen:	Woltmershusen, Rabbelnhusen
Website:	Ortsamt Woltmershusen
E-Mail-Adresse:	[email protected]

Woltmershusen is en vun de 23 Stadtdelen vun Bremen un höört to den Stadtbezirk Süüd to. Hüdigendags höört de twee Oortsdelen Woltmershusen un Rabbelnhusen dorto. De Ökelnaam vun Woltmershusen is „Pusdörp“. De Marktplatz vun düssen Stadtdeel an de Woltmershuser Landstraten heet dor ok üm „Pusdörper Marktplatz“.

Korte Historie

Woltmershusen liggt up de lunke Siet vun de Werser achtern Diek langs den Stroom. Al in de Tiet vun de Fröhgeschicht hefft dor Minschen leevt. 1244 is de Naam to'n eersten Mol in en Urkunn to lesen. 1250 steiht to'n eersten Mol wat vun Rabbelnhusen schreven. De Naam Woltmershusen geiht torüch up en Mann mit Naam „Woltmer“, de dor Land harrt hett. As de Sweden Bremen innehmen wullen, hefft de Bremers dat Dörp in dat Johr 1666 afbrennt, vunwegen dat de Sweden sik dor nich achter bargen un schulen schollen. As dat Dörp denn later wedder upboot wurrn is, sünd en Reeg Huussteden vunwegen dat Hoochwater höger upschudd wurrn, anner dröffen gor nich wedder upboot weern. Ut de ole Tiet is bloß noch de Kamphoff nableven. In dat 18. Johrhunnert geev dat sess Vullhööv, dree Kötners un en Reeg vun Brinksitters un Hüüslingen. Dormols leven bi 300 Minschen in Woltmershusen. 1725 in in Rabbelnhusen vun den Bremer Senat en reformeerte Kark boot wurrn. Dor güngen de Pusdörper ok hen un en tietlang weer düsse Kark sogor tostännig för de Inwahners vun Neenland. Düsse Kark is in'n Tweeten Weltkrieg ganz in Dutt gahn, man achterna wedder upboot wurrn. Woltmershusen höör dormols to den Bremer Goh Neddervieland to. In dat 19. Johrhunnert hett sik de Struktur ännert. An den Werserstrand siedeln sik Bedrieven för Schippbo an. Jummers mehr Inwahners sünd na Pusdörp hentagen un Ladens, Kröög un Bedrieven siedeln sik an. Dor mank weern ok gröttere Industriebedrieven, as de Martin Brinckmann AG un dat Gaswark in Bremen. An den Werser sünd Habenanlagen anleggt wurrn. Dor kemen denn fix Holthannel un Saagwarken hen. Süüdlich vun de Straat „Up den Bohnekamp“ is en groot Parzellenwiek upmaakt wurrn. In dat Johr 1902 hett Woltmershusen sien Sülvstännigkeit verlaren un is Deel vun de Stadt Bremen wurrn. To de glieke Tiet hett Woltmershusen en egen Kark un Karkgemeen an de Landstraten kregen. Dat weer de neegootsche Backsteenbo vun de Christuskarken. 1921 is ok Rabbelnhusen Deel vun de Stadt Bremen wurrn.

Hüdigendags

Hüdigendags leevt in Woltmershusen bi 14.000 Minschen. De Tall ännert sik mit de Johren nich mehr groot. Man dat gifft doch en Reeg Neebowieken. In seven Grootbedrieven arbeit bi 4.000 Lüde. Överhaupt sünd de meisten Lüde, de in Pusdörp arbeiden doot, Handwarkers, Arbeiders un Anstellten.

Verkehr

Na Pusdörp geiht dat up de Woltmershuser Landstraten vun Bremen ut. Bit 1965 för de Stratenbahn Linie 7 bit an de leste Hollstell in Rabbelnhusen, man vun dor af an is de Buslinie 24 an ehr Stäe treden.

Weblinks

Woltmershusen up www.bremen.de (hoochdüütsch)
www.woltmershausen.de, Stadtdeelportal för de Bremer Oortsdelen Woltmershusen und Rabbelnhusen (hoochdüütsch)

Bremer Stadtdelen un Oortsdelen