True Lies
| Filmdaten | |
|---|---|
| Plattdüütsch Titel: | — |
| Originaltitel: | True Lies |
| Düütsch Titel: | True Lies – Wahre Lügen |
| Produkschoonsland: | USA |
| Johr vun’t Rutkamen: | 1994 |
| Läng: | 135 Minuten |
| Originalspraak: | Engelsch |
| Öllersfreegaav in Düütschland: | FSK 16 |
| Filmkru | |
| Speelbaas: | James Cameron |
| Dreihbook: | James Cameron Claude Zidi Simon Michaël Didier Kaminka |
| Produkschoon: | Stepanie Austin Lawrence Kasanoff Rae Sanchini Robert Shriver |
| Musik: | Brad Fiedel |
| Kamera: | Russell Carpenter |
| Snitt: | Conrad Buff Mark Goldblatt Richard A. Harris |
| Szenenbild: | Peter Lamont |
| Kledaasch: | Marlene Stewart |
| Dorstellers | |
| |
True Lies (op Platt so veel as „Wohre Lögen“) is en US-amerikaansche Actionkummedie ut dat Johr 1994 vun James Cameron. De Film parodeert tyypsche Agentenfilmen na James-Bond-Oort, as de Protagonist Fro un Kind blangenstellt warrt – mit all de Problemen, de dor so mit verbunnen sünd.
Inholt
[ännern | Bornkood ännern]Harry Tasker is verheiraadt mit sien Fro Helen mit de tosamen he en Dochter, Dana, hett. All’ns maakt den Anschien, as weer dat en ganz normale Familie mit en ganz normal Leven. He arbeidt as Fachmann för Reeknertechnik un is veel ünnerwegens, wieldat Helen as Sekretärin un Huusfro arbeidt.
Man in Wohrheit is Harry en Geheemagent, so geheim, dat nich mol sien Fro wat dorvun afweet. Sien Tarnung is so good, dat nümms wat markt. All’ns geiht so lang goot, bit Helen sik vun ehrn Mann vun wegen sien Arbeit so dull vernalässigt föhlt, dat se anschienend en Affär mit en Bruuktwagenhännler anfangt, de sik sülvst as en Geheimagenten utgifft. Dat kriggt Harry dör en Tofall spitz un sett all Hevels in Bewegen, üm ehr torüch to kriegen.
Dummerwies is to glieken Tiet en Koppel vun Terroristen in den Besitt vun en Atomwapensprengkopp kamen, de ut Bestännen vun de fröhere Sowjetunion stammt. Dormit drauht se nu de USA. De Saak mit sien Ehfro gifft he sien Kollegen in Opdrag, de dann aver vun wegen de Terroristen afbroken warrn mutt. Dorbi warrt se beid as Börgen nahmen.
Dör en tappsch Snack vun Helen warrt de Terroristen wies, dat se Harrys Fro is. Togliek warrt Helen nu aver wies, dat ehr Ehmann en Spion is. Dat duert en lütten Moment, bit dat se wedder toenanner finnt, man dorna arbeidt Helen un Harry tosamen. Tohopen kriegt se dat kloor, ut de Börgenhaft freetokamen un de meisten vun de Terroristen doodtomaken, de de Bomb al in’t Land smuggelt un nu op de Florida Keys scharp maakt hebbt.
Jüst noch rechttietig kamt Harrys Kollegen mit’n Heevschruver un hollt Harry vun’t Eiland rünner, wieldat de Explosion vun de Bomb nich mehr to verhinnern is. Helen aver is wedder in de Hannen vun de restlichen Terroristen, de över de Brüch vun’n Overseas Highway versöökt uttoneihn. De warrt aver för de Lastwagens vun Kampflegers tonichten maakt. Helen mutt sik in Kamp gegen Juno Skinner dörsetten, de mit de Terrorgrupp gemeensome Saak maakt hett. Helen kann jüst noch to rechten Tiet dör den Heevschruver rett warrn, bevör dat Auto mit Juno in de See stört.
De vörher al afreisten Terroristen künnt in de Twüschentiet Dana in jemehr Gewalt bringen. As Harry dorvun Wind kriggt, sett he sik korterhand in en vun de Kampflegers vun’n Tyyp Harrier AV-88. De Terroristen hebbt sik mit Dana in en Bürohuus verkropen. Dana kann aver, ahn dat een wat markt, de Slötel klauen, de to’n Tünnern vun de tweete Bomb bruukt warrt un neiht dormit op dat Dach vun’t Hoochhuus ut. As Harry mit sien Fleger dor ankummt, schalt he eerst mol de meisten Terroristen mit de Boordkanonen ut. To glieken Tiet verfolgt de Anföhrer Dana op dat Dach un bit rop op en Bokraan. Harry seggt sien Dochter, dat se sik op den Fleger fallen laten schall, un se maakt dat, aver de Anföhrer jumpt achteran, wo he na en lütt Gerangel afrutscht un an en Sidewinder-Rakete hangen blifft. Harry löst de Rakete ut un schütt dormit dör dat kaputte Bürohuus den letzte Heevschruver vun de Terroristen af, womit de Fall op’n Slag afhannelt is.
To’n Afluss vun den Film sütt man Harry un Helen tohopen, as se tohopen bi en Geheimdeenstinsatz op en Fest togang sünd.
Achtergrund
[ännern | Bornkood ännern]- James Cameron weer vun Arnold Schwarzenegger op de franzöösche Kummedie La Totale! henwiest. Wenn man dat nipp un nau nimmt, denn is True Lies en Remake vun La Totale!
- För Cameron weer de Film en Projekt dat an de Steed för en Spider-Man-Film treden is, vör den Michael Biehn as Hööftdorsteller vörsehn weer. Cameron hett vör den Film aver noch nich de notwennigen technischen Möglichkeiten sehn.
- Jamie Lee Curtis hett den Stunt mit den Heevschruver an ehrn Geboortsdag sülvst maakt. Se müss den Speelbaas James Cameron eerst dorvun övertügen, dat se dat sülvst maken künn, un segg över den Stunt later, dat dat en vun de opregendsten Momenten in ehr Leven weer.
- De Nahopnahmen, in de Schwarzenegger in den Kampfleger an’t Hoochhuus to sehn is, weer mit en 1:1-Modell vun de Harrier dreiht, de an en Kraan ophungen weer.
- Anfangs schüll noch en tweeten Deel vun den Film dreiht warrn, man dat is bi den Plaan bleven, wieldat Arnold Schwarzenegger sik op den Wahlkamp för den Gouverneursposten in Kalifornien konzentreert hett un na sien Spood keen Hööftrullen mehr övernehmen künn.
Kritik
[ännern | Bornkood ännern]Lexikon vun’n internatschonalen Film: Ein mit ungeheurem Aufwand gestalteter Actionfilm, der sich über das Genre und seine Effekte lustig machen will, was ihm vor allem mit einer James-Bond-Parodie und einem ins Absurde übersteigerten, technisch abenteuerlich perfekten Ende durchaus gelingt. Dazwischen gibt es aber ebensoviel Routine wie Leerlauf, vor allem auch viele überflüssige Brutalitäten, denen zahllose Klischee-Terroristen zum Opfer fallen. Vorzüglich ist das Spiel der Hauptdarstellerin, die den Wandel zur Abenteurerin glaubhaft macht und mit subtilen Details das sexistische Spiel der männlichen (Agenten-)Welt ironisch unterwandert.[1]
Utteken
[ännern | Bornkood ännern]True Lies weer en spoodriek Film, de för tosamen 21 Filmpriesen vörslahn weer, ünner annern ok för den Oscar in de Kategorie Best Trickeffekt. Wunnen hett de Film 1995 an’n End söss Utteken:
- den Golden Globe för Jamie Lee Curtis in de Kategorie Best Hööftdorstellerin – Kummedie oder Musical
- den Saturn Award för James Cameron in de Kategorie Best Speelbaas.
- den Saturn Award för Jamie Lee Curtis in de Kategorie Best Schauspelerin.
- den Saturn Award för John Bruno in de Kategorie Best Spezialeffekten.
- den ASCAP Award för Brad Fiedel för sien Filmmusik.
- den American Comedy Award för Jamie Lee Curtis in de Kategorie Lustigste Hööftdorstellerin in en Speelfilm
Literatur
[ännern | Bornkood ännern]Daniela Langer: I married Rambo. In: Eckhard Pabst: Mythen – Mütter – Maschinen. Das Universum des James Cameron. Verlag Ludwig, Kiel 2005, S. 112–120, ISBN 3-933598-71-0
Borns
[ännern | Bornkood ännern]Weblenken
[ännern | Bornkood ännern]- True Lies in de Internet Movie Database (engelsch)
- Filmkritik op Rotten Tomatoes