Tora Berger
Tora Berger (* 18. März 1981 in Ringerike) is en ehmalge norweegsch Biathletin, de 2010 in Vancouver un 2014 in Sotschi Olympiasiegerin wurr un acht Weltmeestertitel up hör Naam schrieven kunn.
Karriere
[ännern | Bornkood ännern]Tora Berger wurr 1999 in de Natschonalkader vun Norwegen upnommen un geev hör Debüt in den Weltcup in dat Johr 2001.
Berger wunn bi de 2. Mixed-Relay-Weltmeesterschapen 2006 mit de norweegsch Staffel de Sülvermedaille achter de russisch Staffel un vör Frankriek. Bi de Weltmeesterschaft 2007 in Antholz kunn se in den glieker Wettbewarf un mit de Daamenstaffel jewiels Bronze halen. In dat eerst Verfolgungsrennen vun de Weltcupsaison 2007/2008 wunn se in Kontiolahti eerstmals en Weltcuprennen.
Bi de Weltmeesterschapen 2008 in dat sweedsch Östersund belegg Berger in de eersten dree Eenzelrennen (Sprint, Verfolgung, Eenzel) dree Mal den veerten Platz, verpass deelwies blots knapp en Medaille. In dat letzt Eenzelrennen, den Massenstart, leeg se dat ganze Rennen över in utsichtsriek Positschoon: Mit de Düütsche Magdalena Neuner, de Russin Jekaterina Jurjewa un de Ukrainerin Wita Semerenko gung Berger meest tietgliek nah dat letzt Scheten in de Slussrunn. Bit to dat Teel leefer se sück um den Sieg en Duell mit Magdalena Neuner, wobi Berger to’n Sluss knapp ünnerlegen weer. De Sülvermedaille in dat Massenstartrennen weer för de Norwegerin aber de eerste Eenzelmedaille överhoopt.
Bi den Weltmeesterschaften 2009 in dat süüdkoreaansch Pyeongchang hett se dör en darten Platz achter Kati Wilhelm un Teja Gregorin Bronze in dat Eenzelrennen över 15 km. Ehrn gröttsten sportlichen Erfolg fier Tora Berger mit den Olympiasieg in dat Eenzelrennen vun Vancouver 2010 vör Jelena Chrustaljowa un Darja Domratschawa.
To’n Afsluss vun de Saison wunn Berger den Titel in’n Sprint bi de Norweegsch Meesterschapen. Wiedere groot Erfolge in hör Loopbahn gelungen Tora Berger bi de Biathlon-Weltmeesterschapen 2012 in Ruhpolding mit den Weltmeestertiteln in’n Eenzel (vör Marie-Laure Brunet un Helena Ekholm) un Massenstart (vör Marie-Laure Brunet un Kaisa Mäkäräinen), hör eerst beid WM-Titel in Individualrennen. Dorneben wunn se Gold mit de Mixed-Staffel un belegg mit de norweegsch Fruen-Staffel noch den darten Platz. Dormit wunn se bi disse Weltmeesterschapen veer Medaillen un weer de spoodriekste Athletin bi disse Titelkämpen. Ansluutend wurr se ok noch eerstmals Sportlerin vun dat Johr in Norwegen.
As Darte in’n Gesamtweltcup vun dat Vörjohr schaff Tora Berger en perfekten Start in de Saison 2012/2013. In dat sweedsch Östersund wunn se dat Eenzelrennen, den Sprint un de Verfolgung. In den wiederen Verloop vun de Saison wunn se wiedere Rennen un weer ok regelmatig up dat Podium vertreden. Grundlaag för hör goot Ergevnisse weern sekere un vör allen bannig flink Scheetinlagen, mit de se as Slusslöperin ok för twee Siege mit de norweegsch Fruenstaffel sörg. Ofschons Berger ünner annern wegen hör Loopstil nich to de flinkste Löperinnen in dat Starterfeld hörr, behull se dank hör konstant goot Leistungen bit zo de Biathlon-Weltmeesterschapen 2013 de Führung in’n Gesamtweltcup. In dat eerst Rennen vun de Weltmeesterschapen, de Mixed-Staffel, legg se as Startlöperin mit en fehlerfree Scheten de Grundlaag för den gemeensamen Gewinn vun de Goldmedaille mit Synnøve Solemdal, Tarjei Bø un Emil Hegle Svendsen. Nah den tweeten Platz in’n Sprint (achter Olena Pidhruschna aber vör Wita Semerenko] wunn se de Verfolgung (vör Krystyna Pałka un Olena Pidhruschna), den Eenzelwettbewarf (vör Andrea Henkel un Walentyna Semerenko) un gemeensam mit Hilde Fenne, Ann Kristin Flatland un Synnøve Solemdal de Fruenstaffel, bevör se to’n Afsluss vun de Weltmeesterschapen noch Sülver in den Massenstart halen dee. Mit en Medaille in jeder Rennen (4x Gold, 2x Sülver) sloot se dormit as best Athletin en meest perfekt Weltmeesterschap af. Bi den Heim-Weltcup in Oslo an’n Holmenkollen wunn se all Wettbewarfen un seker sück dormit vör de Tiet sowohl den Gewinn vun den Gesamtweltcup as ok vun den Verfolgungsweltcup.
Bi de Olympisch Spelen 2014 in Sotschi wunn Berger dree Medaillen: Gold mit de Mixed-Staffel, Sülver in de Verfolgung (achter Darja Domratschawa, vör Teja Gregorin) un Bronze mit de Fruenstaffel. In’n Gesamtweltcup belegg Berger mit blots veer Punkten Rückstand den tweten Platz achter Kaisa Mäkäräinen.
Nah de Saison 2013/2014 hett Tora Berger hör Loopbahn afsloten.
Insgesamt hett se in hör Loopbahn 28 Weltcuprennen wunnen. Dorto kemen noch wiedere 9 Weltcupsiege in Staffelrennen.
Privates
[ännern | Bornkood ännern]Tora Berger is de Süster vun den Biathleten un Langloop-Weltmeester Lars Berger. In’n Juni 2010 hett se hör langjohrigen Fründ Trond Teveldal heiraadt.[1] In’n April 2015 ist hör eerst Kind (en Söhn) boren.
Weblenken
[ännern | Bornkood ännern]
- Tora Berger in de Datenbank vun de IBU (engelsch)