Tinganes

Lüttje Gaten up Tinganes. Sütt ut as en Freelichtmuseum, is avers Sitt vun de Regeerung

De Halfinsel Tinganes. De roden Hüser vörn höört to de Regeerung vun dat Land.

Breefmark vun 1991, Linolsnitt nah en oold Foto

Tinganes (up Platt: "Thing-Landtung") is en Halfinsel in de Hööftstadt vun de Färöers, Tórshavn. Sien Naam hett Tinganes vun dat Løgting, wat al in de Tied vun de Wikingers up de Färöer afholen wurrn is. Al um 900 rüm sünd hier de free’n Mannslüde vun de Färöer tohopenkamen to'n Thing. De olen Teken vun dat Thing sünd to'n Deel noch to sehn, vunwegen dat se in de Steen up de Halfinsel schreven wurrn sünd. Midderwielen is dat Løgting en beten wieter na Norden hen in't Zentrum vun de Stadt unnerkamen, man de Regeerung vun de Färöer sitt hier jummers noch. Tinganes is Tórshavn sien ollsten Deel. Ole Gaten sünd hier to finnen un ok de Domkarken vun Tórshavn steiht hier.

De „seven Wunner vun de Färöer“

To de Ólavsøka 2007 hett dat färöösche Feernsehn Sjónvarp Føroya in dat ganze Land en Wettstriet afholen over de „seven Wunner vun de Färöer“. Dor konnen de Tokiekers Vörsläge maken over besunnere Bowarke un annere Gegenstänn up de Eilannen. Vunwegen dat in een Fall liek veel Stimmen afgeven wurrn sünd, hett dat acht Winner geven. De Rangfolg vun de Winner is nich bekannt maakt wurrn, man Tinganes hett dor to höört. De annern sünd de Karkenstöhl vun Kirkjubøur, de Magnuskathedral, de Krischanskarken in Klaksvík, dat Huus vun den Norden, de Norðoyatunnilin, de eerste Flagg vun de Färöer in de Karken vun Fámijn un de Sitt vun de Rieksombudschop vun de Färöer (de beiden lesten mit lieke Stimmentahl).

Weblenken

• Tinganes.fo - Homepage vun de Regeerung