Sócrates

Sócrates Brasileiro Sampaio de Souza Vieira de Oliveira (bekannt as Dr. Sócrates; * 19. Februar 1954 in Belém; † 4. Dezember 2011 in São Paulo) weer en brasiliaansch Footballspeler un Kinnerdokter.

Karriere

Sien Lännerspeelkarriere fung 1979 an. He hett 60 Lännerspelen för Brasilien makt un dorbi 22 Doren schaaten. De Middelfeldspeler nehm as Kapitän vun sien Mannschap an de Football-Weltmeesterschapen 1982 und 1986 deel.

De Mann mit den länsten Naam vun all je offiziell registreert Weltmeesterschapsdeelnehmer, weer de drieven Kraft in de Offensive vun de brasiliaansch Natschonalmannschap vun de 1980er Johren. Sócrates bill tosommen mit Zico, Falcão un Toninho Cerezo dat „magische Middelfeld-Quartett“ vun Brasilien, dat ok de „Fantastischen Veer“ nömmt wurr. Weltmeester wurrn sünd se mit Sócrates nich, gellen aber in Brasilien tosommen mit de 1970er Mannschap um Pelé dennoch a de best Seleção vun all Tieden.

Sócrates, de 192 cm groot weer, aber blots Schohgrött 41 harr un berühmt för sien Afsatzkicks un Steilpassen mit de Hack weer, gull as Enfant terrible vun den brasiliaanschen Football. Nah eegen Utsaagen hett he jeden Dag mehr as twintig Zigaretten rookt, ehder wenig traineert, fier dorum aber ok mehr. Bi Corinthians São Paulo hett he demokraatsch Strukturen dörsett (de so nömmt Democracia Corinthiana), so dat de Speler fortan all bestimmen deen, vun de Trainingstieden bit hen to den Spiesplaan. Todem hett he de Fans dorto uproopen, sück tegen de Militärdiktatur un för de Demokratie intosetten. Sócrates weer en studeerten Dokter un wurr dorum ok Dr. Sócrates nömmtt. Wiel he parallel to sien Loopbahn as Football-Profi sien Studium makt, hett he de Deelnahm an de Football-Weltmeesterschap 1978 in Argentinien verpasst.

Nah sien aktiv Tiet as Footballspeler hett he as Kinnerdokter in en Krankenhuus vun Ribeirão Preto arbeit. Aber he weer, as sien ehmalg Mannschapskollege Zico ok, en kritischen Beobachter vun de Footballszene. He hett sück immer weer för Reformen insetter (as Doorkamera, mehr Schiedsrichter, oder blots mit 9 Mann spelen

In‘ August 2011 wurr Sócrates mit Magenblööden un swullen Lever in en Krankenhuus inleefert un muss mehrere Daag up de Intensivstatschoon blieven. In dissen Tosommenhang hett he ok sien Alkoholprobleme apenlich makt. An‘ 4. Dezember 2011 is he mit 57 Johr in São Paulo an en dör en Darminfektschoon veroorsakt Sepsis storven.

Wat anners noch wichtig is

De bannig politisch engageert Sócrates (rechts) bi en Kundgeven in dat Johr 1984 in‘ Rahmen vun de Demokratiebewegen in Brasilien

Ok Sócrates' jüngere Bröer Raí weer spoodriek Natschonalspeler un tietwies Kapitän vun de brasiliaansch Natschonalmannschap, mit de he 1994 ok Weltmeester wurr.

Wenig Stünn nah den Dood vun Sócrates wunn Corinthians to’n fievten Mal in de Vereenshistorie de brasiliaansch Meesterschap. Bevör de entscheeden Partie tegen den Stadtrivalen Palmeiras São Paulo anpeepen wurr (Endstand: 0:0) hebbt de Spelers in‘ Middelkreis sück vun Sócrates verafscheedt. In Nahahmen vun Sócrates sien Geste bi en Doorjubel hebbt de Akteure de Fuust nah baben reckt.

Socrates sien Beerdigung in Ribeirão Preto funn an de glieker Dag statt.

Weblenken

Sócrates. Mehr Biller, Videos oder Audiodateien to’t Thema gifft dat bi Wikimedia Commons.

• Alois Gstöttner und Karina Lackner: Sócrates: Von Fahnen und Freiheiten In: Null Acht; afropen an’ 25. Oktober 2012