Raben (Landkreis Lümborg)
| Wapen/Flagg | Koort | |
|---|---|---|
 |
| |
| Basisdaten | ||
| Inwahners: | ||
| Postleettall: | 21388 | |
| Vörwahl: | 04172 | |
| Geograafsche Laag: | Koordinaten:53° 10′ N, 10° 10′ O53° 10′ N, 10° 10′ O | |
|
| ||
Raben (hoochdüütsch Raven) is en Dörp in de Gemeen Soosdörp (Samtgemeen Amelkusen) in’n Landkreis Lümborg, Neddersassen.
Geografie
[ännern | Bornkood ännern]De Oort liggt in de Lümbörger Heid. Dat Water ut dat Rebeed flütt över Hambeek un Swinnbeek na de Luh hen af.
De Naveröörd sünd Eyndörp un Solzhusen in’n Noorden, Puunsen in’n Noordoosten, Wetzen in’n Oosten, Olndörp un Wohlenbüttel in’n Süüdoosten, Rulfsen un Soosdörp in’n Süden, Ebendörp in’n Süüdwesten un Äästörp un Lübberstää in’n Noordwesten.
Historie
[ännern | Bornkood ännern]To de öllsten Funnen op dat Rebeed von dat Dörp höört dat Hünenbedd von Raben un de Grootsteengräver op’n Strietbarg.
In’n Eersten Weltkrieg sünd ölven Soldaten ut Raben fullen oder vermisst un in’n Tweten Weltkrieg 23.[1]
Verwaltungsgeschicht
[ännern | Bornkood ännern]In de Franzosentied hett de Oort toeerst 1810 bet 1811 binnen dat Königriek Westfalen to de Mairie Luhmöhlen in’n Kanton Garlstörp höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Karkgellsen in’n Kanton Garlstörp.
De Oort hett vör 1852 to de Amtsvaagdie Garlstörp in dat Amt Winsen höört. Von 1852 bet 1859 hett de Oort to dat Amt Solzhusen höört un von 1859 bet 1885 wedder to dat Amt Winsen. Na 1885 weer dat in’n Kreis Winsen. 1932 is dat Deel von’n Kreis Horborg worrn.
De Oort weer fröher en egenstännige Gemeen. Düsse Gemeen is 1928/1929 mit de Gemeen Rulfsen tohoopleggt worrn. De ne’e Gemeen hett Raben heten. To’n 1. Oktober 1951 hett sik dat ännert: Raben un Rulfsen sünd wedder twee egenstännige Gemenen worrn.[2] Mit de Gemeenreform in Neddersassen an’n 1. Juli 1972 is Raben denn aver mit Rulfsen un Soosdörp to de Gemeen Soosdörp tohoopleggt worrn. An’n 1. März 1974 keem de Gemeen Soosdörp von’n Landkreis Horborg an’n Landkreis Lümborg. Siet dissen Dag höört de Gemeen Soosdörp to de Samtgemeen Amelkusen.
Inwahnertall
[ännern | Bornkood ännern]Dörp Raben:
| Johr | Inwahners |
|---|---|
| 1791[3] | 13 Füürsteden |
| 1812[4] | 72 |
| 1824[5] | 14 Füürsteden |
| 1848[6] | 137 Lüüd, 18 Hüüs |
| 1. Dezember 1871[7] | 162 Lüüd, 20 Hüüs |
| 1. Dezember 1885[8] | 142 Lüüd, 22 Hüüs |
| 1. Dezember 1905[9] | 162 Lüüd, 23 Hüüs |
| 1. Dezember 1910[10] | 163 |
| 1925[11] | 172 |
| 1. Oktober 1951[2] | 369 |
Gemeen tohoop mit Rulfsen:
| Johr | Inwahners |
|---|---|
| 1933[11] | 300 |
| 1939[11] | 315 |
| 30. September 1951[2] | 617 |
Religion
[ännern | Bornkood ännern]
Raben is evangeelsch-luthersch präägt un billt mit de Martin-Kark en egen Kaspel.
För de Kathoolschen is de Marien-Kark in Lümborg tostännig.
De Doden warrt op’n Karkhoff Raben bi de Kark begraven.
Börgermeesters
[ännern | Bornkood ännern]- –1972: Jürgen Müller sen.
Kultur
[ännern | Bornkood ännern]In Raben steiht en Denkmaal för de Fullenen ut de twee Weltkrieg’.
Verenen
[ännern | Bornkood ännern]De Schüttenvereen Raben-Rulfsen is 1925 grünnt worrn.
Bruukdom
[ännern | Bornkood ännern]In’n Winter fiert de Dörper Raben un Rulfsen tohoop Faslam.
Weertschop un Infrastruktur
[ännern | Bornkood ännern]För Raben is de freewillige Füürwehr Raben-Rulfsen tostännig, de 1946 grünnt worrn is. Dat Sprüttenhuus steiht in Rulfsen.
Verkehr
[ännern | Bornkood ännern]Dör Raben löppt de Kreisstraat 44, de in’n Noorden över Eyndörp na Solzhusen geiht un in’n Süüdwesten över de Öörd Rulfsen, Soosdörp, Swimmbeck, Stimbeck un Hützel na Bissen. Von Soosdörp kummt een över de K 9 na Amelkusen an de Bundsstraat 209. Von de K 44 in Raben gaht in’n Oosten de K 20 af na de Landsstraat 234 un wieder na Wetzen un Örzen un in’n Süüdwesten de K 41 na Ebendörp.
De nächste Autobahn is de Autobahn 7 (Afsnidd Hamborg–Hannover). De Opfohrt 42 Ebendörp liggt so acht Kilometer in’n Westen von Raben an de L 212 un de Opfohrt 41 Äästörp acht Kilometer in’n Noordwesten an de K 5.
De nächste Bahnhoff is so bi 22 Kilometer wied weg in’n Noorden de Bahnhoff Winsen an de Bahnlien Hamborg–Hannover. De Bahnhoff Lümborg an de sülve Bahnlien liggt 24 Kilometer in’n Noordoosten. De Bahnhoff Wriel an de Bahnlien Ülzen–Langwedel is 26 Kilometer in’n Süden. Von 1913 bet 1975 hett dat ok op de Bahnlien Lümborg–Soltau Personenverkehr geven. De nächste Bahnhoff weer in disse Tied veer Kilometer in’n Süden in Soosdörp. Von 1906 bet 1970 hett dat in Eyndörp an de Bahnlien Winsen–Hützel ok en Bahnhoff mit Personenverkehr geven. De weer veer Kilometer wied weg in’n Noorden.
Scholen
[ännern | Bornkood ännern]De Kinner ut Raben gaht na de Grundschool Soosdörp.
Footnoten
[ännern | Bornkood ännern]- ↑ Onlineprojekt Gefallenendenkmäler
- ↑ a b c Neues Archiv für Niedersachsen. Band 5, W. Dorn, 1952, Sied 630
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 187
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 58
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 498
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 104
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 134
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 140
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 184
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de
Weblenken
[ännern | Bornkood ännern]
Raben (Landkreis Lümborg). Mehr Biller, Videos oder Audiodateien to’t Thema gifft dat bi Wikimedia Commons.