Petra Behle

Petra Behle (* 5. Januar 1969 in Offenbach as Petra Schaaf) is en ehmalge düütsch Biathletin.

Biathlonkarriere

Nahdem de Familie nah Mittenwald umtrucken weer, hett Petra Behle mit acht Johren Skifohren lehrt un fung mit deb Langloop an. 1986 keem se up dat Ski-Internat in Willingen. Dor hett hör hör dormalig Trainerin Renate Schinze to'n Biathlon brocht. Petra Behle is för den SC Willingen antreeden. Se wurr 1988 de jüngste düütsch Weltmeesterin in' Biathlon, as se in' Sprint vör Eva Korpela un Anne Elvebakk wunn. Mit veer Eenzel- un fiev Staffelgoldmedaillen is se nah Magdalena Neuner de tweet-spoodriekste düütsch WM-Deelnehmerin vun all Tieden (Stand: 12. März 2011). Trotz hör överragen Weltmeesterschapsergevnisse kunn se aber bi dree Olympisch Spelen kien Eenzelmedaille winnen, aber jewiels en Medaille mit de Staffel. Ähnlich gung hör dat in' Weltcup: Mit twintig wunnen Rennen hörrt se ok hier to de spoodriekst Fruen  – Magdalena Forsberg as Best wunn 42 Rennen. Den Gewinn vun en Eenzel- oder gor den Gesamtweltcup hett Petra Behle nich schafft, twee darte Platzen in' Gesamtweltcup weer hör best Ergevnis.

Beroplich Werdegang

Van 1998 bit 2007 weer se bi den ZDF as Biathlonexpertin to sehn. Tosommen mit Christa Haas un af de Wintersaison 2006/2007 mit Norbert König modereer se de Live-Överdragen vun de Wettbewarfen. Hör Nahfolger in de Positschoon wurr Sven Fischer.

Sportfunktschonärin

Petra Behle is persönlich Liddmaat vun dat NOK un Aktivensprekerin in de Landssportkonferenz Hessen. Todem is se Liddmaat in' Gutachterutschuss vun de Düütsch Sporthülp. An de European Business School hett se 2003 en Utbillen to en Sportökonomin spoodriek maakt.

Privatleven un Engagement

1994 hett se den Langlöper Jochen Behle heiraadt, vun de se sück in' April 1999 weer trennt hett. An' 30. Januar 2009 hett se nochmal heiraadt. Petra Behle wahnt to Tiet in Biebertal. Se is ehrenamtlich as Schermherrin vun de Tour der Hoffnung tätig, en Prominentenradtour, mit deren Hülp jedes Johr Spenden to Gunsten vun krebskrank Kinder sammelt wurrn.

Wat se schafft hett

Olympische Winterspiele

• 1992: Sülver (Staffel)
• 1994: Sülver (Staffel)
• 1998: Gold (Staffel)

Weltmeesterschapen

• 1988: Gold (Sprint)
• 1989: Gold (Eenzel), Bronze (Mannschap)
• 1990: Sülver (Mannschap), Bronze (Eenzel)
• 1991: Gold (Eenzel)
• 1992: Gold (Mannschap)
• 1993: Gold (Eenzel)
• 1995: Gold (Staffel), Sülver (Mannschap)
• 1996: 2x Gold (Staffel, Mannschap)
• 1997: Gold (Staffel)

Gesamtweltcup

• 2x Platz 3 (1991/92; 1995/96)

Weltcupsiege

• 20

Literatur

• Ernst Probst: Superfrauen 12 - Sport. Biographien berühmter Sportlerinnen in Wort und Bild. 1. Uplaag. 2001, ISBN 3-935718-04-7, Petra Behle: Die beste Biathlon-Sportlerin, S. 27–28.

Weblenken

• Websteed vun Petra Behle
• Petra Behle in de Datenbank vun de IBU (engelsch)
• Petra Behle in de Datenbank vun Sportsreference.com (engelsch)