Niña

De Niña (spaansch för lütt Deern) weer een vun de dree Scheep op Christoph Kolumbus sien eerste Expeditschoon vun 1492 bet 1493, op de he en Weg na Indien övern Westen söch. Mit vun de Partie weren dat Flaggschipp Santa Maria un dat Schipp Pinta. En Seeweg na Indien hett Kolumbus nich opdeckt, vun wegen dat em de Kontinent Amerika in’e Mööt keem, den he dormit för Europa opdeckt harr (Nadem al annere för em dat harrn, wat aver keen so grote Utwarken harr).

Dat Schipp weer 1491 ünner den Naam Santa Clara in’t andaluusche Moguer, nich wiet vun Palos de la Frontera, op Kiel leggt worrn. De eerste Besitter heet Juan Niño. Se weer en Karavell mit veer Masten un ene Läng vun üm un bi 20 Meter, ene Breed vun üm un bi söven Meter un en Deepgang vun wat mehr as twee Meter. Dat Schipp kunn 60 Tünnen dragen.

Kapitän vun de Niña op ehr eerste Reis weer Vicente Yáñez Pinzón. Nadem se in’n März 1493 na Palos de la Frontera trüchkehrt weer, hett Kolumbus se op siene twete Reis wedder insett. Se is al in’n September wedder vun Cádiz losföhrt. Kolumbus weer nu Egendömer vun de Niña un nehm se as sien Flaggschipp bi de Reis, op de he Jamaika un Kuba opdeck. An’n 12. Juni 1494 kehr he mit ehr na Hispaniola trüch. Dat temlich lädeerte Schipp muss repareert warrn. Eerst 1496 kunn Kolumbus na Spanien trüchkehren.

1497 hett de Niña en Hannelsreis na Rom maakt. In de Neeg vun Sardinien hebbt franzöösche Piraten dat Schipp opbracht. De Mannschop kunn aver dat Lösegeld betahlen un mit de Niña na Spanien trüchkehren.

1498 is se wedder op Westindienfohrt gahn, 90 Siedlers na Hispaniola to bringen.

Wegen ene Müüteree in siene Kolonie weer Kolumbus nu in Geldnoot un müss siene leve Niña an en Person, de Diego Ortiz heet, verköpen. Över dat Schicksal vun dat Schipp is vun denn an nix mehr bekannt.

Literatur

• Lyon, Eugene: 15th-Century Manuscript yields First Look at Niña, in: National Geographic, Vol. 170, No. 5, November 1986