Mairie
En Mairie (feminin, Börgermeesteramt, Börgermeesteree) is in Frankriek un in annere frankophone Rebeden op de een Sied de Behörde von’n Börgermeester (franzöösch maire), op de anner Sied in Gemenen ahn Stadtrechten un in de Arrondissements municipaux von gröttere Städer (in Frankriek Paris, Marseille, Lyon) för dat Gebüüd, in dat dat Börgermeesteramt un de Gemeenverwaltung ünnerbrocht sünd un de Gemeenraad in sitt. De offizielle Utdruck för de Mairien von de Arrondissements municipaux is mairie d'arrondissement. Faken sünd in dat Gebüüd von de Mairie ok noch annere kommunale Inrichtungen in, so as dat Standsamt oder dat Katasteramt. In Städer mit Stadtrecht heet düt Gebüüd Hôtel de ville (Raadhuus) un in lüttjere Öörd in Frankriek un de frankophone Swiez, de keen egen Börgermeester hebbt, maison communale (Gemeenhuus). In Frankriek op’n Land gifft dat faken ok de mairie-école, in de Mairie un School in ünnerbrocht sünd.
Dat Woord (von latiensch maior, franzöösch maire, „Börgermeester“) is toeerst in Oorkunnen ut dat 13. Johrhunnert to finnen un keem in dat 14. Johrhunnert ok in de Form mairerie vör.[1]
Napoleoonsche Tied
[ännern | Bornkood ännern]Dat Eerste Franzöösche Kaiserriek ünner Napoleon hett en Reeg Rebeden innahmen, de vörher to annere Staten höört harrn. De Rebeden sünd deelwies direkt an Frankriek fullen oder an Satellitenstaten von Frankriek. Mehrstendeels sünd de olen Verwaltungsstrukturen kumplett oplööst un dat franzöösche System mit Mairien, Kantons, Arrondissements un Départements is inföhrt worrn. To düsse Rebeden hebbt ünner annern dat Linke Rhienöver (1798–1814), dat Groothertogdom Berg (1806–1813), dat Königriek Westfalen (1806–1813) un de Hanseaatschen Departements (1811–1813) höört.
Nadem Napoleon slahn weer un de Rebeden wedder unafhängig von Frankriek worrn sünd, sünd de Verwaltungsreformen in welke Delen kumplett wedder op den Stand vör de Franzosentied trüggännert worrn. In annere Rebeden is de franzöösche Struktur aver ok bibehollen worrn un blots de Utdrück hebbt sik ännert. Dorbi is denn ut de Mairie en Börgermeesteree worrn. De franzöösche Munizipalverfaten an sik is aver in Kraft bleven.[2] Ok na’n Wiener Kungress is de Munizipalverfaten deelwies bleven, in Westfalen to’n Bispeel bet dor to’n 31. Oktober 1841 de ne’e Landgemeenordnung inföhrt worrn is.[3] De Gemeenstrukturen in dat Rhienland, besünners op de linke Sied, weren deelwies noch bet to de Rebeedsreform in Noordrhien-Westfalen in de Johren 1970 präägt von de Verwaltungseenheiten, de de Franzosen inföhrt harrn.
Weblenken
[ännern | Bornkood ännern]
Footnoten
[ännern | Bornkood ännern]- ↑ Paul Robet: Petit Robert. Dictionnaire de la langue française. Ed. Dictionnaire Le Robert, Paris.
- ↑ Grundriss zur deutschen Verwaltungsgeschichte, Reihe A Preußen. Bd. 7 Rheinland, bearbeitet von Rüdiger Schütz. Johann-Gottfried-Herder-Institut, Marburg 1978, ISBN 3-87969-122-3, S. 10–11.
- ↑ Veit Veltzke: Napoleon, Trikolore und Kaiseradler über Rhein und Weser. Böhlau Verlag, Köln 2007, ISBN 978-3-412-17606-8, S. 505 ff.