Kita
.jpg)
En Kita (von hoochdüütsch Kindertagesstätte) is en Inrichtung, in de Kinner daags betreut warrt. Dat verlöövt to’n Bispeel de Öllern arbeiden to gahn. In wat för en Öller Kinner na en Kita gahn köönt, dat is nich eenheitlich fastleggt. Faken is dat aver so, dat de Kinner noch in dat eerste Levensjohr in en Kita kaamt.
Formen
[ännern | Bornkood ännern]Dat gifft verscheden Formen von Kinnerbetreuung:
- Speelkreis: De Speelkreis is von de Grundidee en Grupp von Öllern, de sik tohoopdaan hett, üm de Kinner to betreun. De Betreuers köönt de Öllern sülvs oder ok anstellte Betreuers ween.
- Kinnerkrübb: För junge Kinner in dat eerste bet drüdde Levensjohr
- Kinnergoorn: För Kinner in dat drüdde bet sösste Levensjohr
- Kinnerhort: För Kinner, de al na School gaht
De Definitschonen för en Kita un för de besünneren Formen sünd aver nich eenheitlich fastleggt un köönt in verscheden Länner un Regionen afwieken.
Dregers
[ännern | Bornkood ännern]Blangen de Dregers, de von de Karken utgaht (to’n Bispeel Caritas, Diakonie), de groten Wollfohrtsverbänn (to’n Bispeel Paritätisch Wollfohrtsverband, AWO) un de kommunalen Dregers (de Gemenen un Städer) gifft dat von wegen de staatliche Förderung jümmer mehr ok private Anbeders.
Bedrievskitas warrt mehrstendeels von Dregers bedreven, de nich to dat Ünnernehmen höört.
Reformpädagoogsche Inrichtungen so as Waldorf-Kinnergoorns un Montessori-Hüüs gifft dat siet en poor Johrteihnten in Vereensform.