De Hoppen (Humulus lupulus) is ene tweehüsige Slingplant, de mit ehre Ranken bit to söss Meter hooch klattern kann. De echte Hoppen kummt as wilde Plant in vele Rebeden vun Europa vör, besunners in Büschen, wo de Bodden fuchtig is. De riepen, tappenförmigen Fruchtdolden dräägt an ehre Bläder Drüsen, de enen gälen, klevrigen Bitterstoff utscheedt. Dit Hoppenbitter deent in de Broereen darto, dat Beer sienen Smack to geven un to konserveren. De Anbo för de Beerbroereen warrt in Hoppegoorns in sünnige, stormsekere Lagen up depen, sandigen Lehmbodden bedreven. In'n Harvst warrt de teihn Zentimeter langen Steeklingen plant. Lange Stangen oder beter noch söss bet acht Meter hoge Gerüsten mit Draht stütt de Ranken. Wenn de Fruchttappen sik tosamentreckt un klevrig, grööngääl utseht, warrt de Planten daalreten, de Dolden vörsichtig afplückt un de gele bittere Kien insammelt. De Hööftanborebetten sünd in Süddüütschland, in Tschechien, in England un de USA.
