Duhrn

Wapen/Flagg	Koort
Basisdaten
Bundsland: Neddersassen Landkreis: Horborg Samtgemeen: Töst Gemeen: Duhrn
Inwahners:
Postleettall:	21255
Vörwahl:	04182
Geograafsche Laag:	53° 18′ N, 9° 42′ O

Duhrn (hoochdüütsch Dohren) is en Dörp in de Gemeen Duhrn (Samtgemeen Töst) in’n Landkreis Horborg, Neddersassen.

To Duhrn höört ok de Oortsdeel Hääg mit to.

Geografie

Duhrn liggt in de Lümbörger Heid. Dör dat Dörp flütt de Duhrner Möhlenbeek, de von Töst kummt un in’n Noordoosten von’n Oort in de Eest münnt.

De Naveröörd sünd Makensbrook un Hääg in’n Noorden, Boitschen un Dreest in’n Noordoosten, Kakenstörp in’n Oosten, Glüsen in’n Süüdoosten, Töst in’n Süden, Wüstenhöben in’n Süüdwesten un Avens un Evsdörp in’n Noordwesten.

Historie

1954 hett Willi Wegewitz bi Hääg en Urnen-Grafffeld ut de Tied von 500 bet 300 v. Chr. utgraavt.

In’n Eersten Weltkrieg sünd twölv Soldaten ut Duhrn fullen oder vermisst un in’n Tweten Weltkrieg 33.

Verwaltungsgeschicht

In de Franzosentied von 1810 bet 1814 hett de Oort to de Mairie Töst in’n Kanton Töst höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to de Vaagdie Töst in dat Amt Horborg tohöört. 1852 is de Oort in dat Amt Mesborg wesselt. Dor is he bet 1859 bleven, denn is dor dat Amt Töst von worrn. Na 1885 weer dat in’n Kreis Horborg. 1932 is dat Deel von’n ne’en, grötteren Kreis Horborg worrn.

Inwahnertall

Johr	Inwahners
1793-00-001793	17 Füürsteden
1812-00-001812	129
1824-00-001824	25 Füürsteden
1848-00-001848	205 Lüüd, 27 Hüüs
1871-12-011. Dezember 1871	212 Lüüd, 36 Hüüs
1910-12-011. Dezember 1910	247
1925-00-001925	264
1933-00-001933	272
1939-00-001939	288

Religion

Duhrn is evangeelsch-luthersch präägt un höört to dat Kaspel von de Johannes-de-Döper-Kark in Töst.

För de Kathoolschen is de Hillig-Hart-Kark in Töst tostännig, de siet 1. November 2014 to de Karkengemeen St. Petrus in Bookholt tohöört.

Kultur

In Duhrn steiht en Denkmaal för de Fullenen ut de twee Weltkrieg’.

Verenen

De Sportvereen Duhrn is 1974 grünnt worrn. De Baseball- un Softball-Sparte von’n SV Duhrn, de Duhrn Wild Farmers, hebbt en Tied lang in de Baseball-Bundsliga speelt.

Weertschop un Infrastruktur

Duhrn hett en egene freewillige Füürwehr.

Verkehr

Dör Duhrn löppt de Landsstraat 141, de in’n Noorden över Makensbrook na Hullnst, Mesborg un Buxthu geiht un in’n Süden na Töst an de Bundsstraat 75 un in Will an de Bundsstraat 3 ran. Ans gifft dat blots noch en lüttjere Straat na Wüstenhöben. De B 75 löppt von Töst ut in’n Süüdwesten na Lauenbrüch, Scheeßl un Rodenborg un in’n Noordoosten över Kakenstörp an Bookholt langs na Ninndörp.

De nächste Autobahn is de Autobahn 1 (Afsnidd Hamborg–Bremen). De Opfohrt 45 Hullnst liggt so söss Kilometer in’n Noorden von Duhrn an de L 141.

De nächste Bahnhoff is so bi fiev Kilometer wied weg in’n Süüdoosten de Bahnhoff Töst an de Bahnlien Hamborg–Bremen. Von 1917 bet 1971 hett dat in Wüstenhöben ok en lütten Bahnhoff an de Bahnlien Wilst–Töst geven, wat twee Kilometer weg is.

Scholen

De Kinner ut Duhrn gaht na de Grundschool Wist. Nadem se mit de Grundschool trech sünd, gaht de Kinner normalerwies in Töst na School, op de Hauptschool Töst, de Realschool Töst oder dat Gymnasium Töst. In Duhrn hett dat von 1995 bet 2015 en Kita geven. De Kita müss dichtmaken, nadem för 2015/2016 nich noog Kinner anmellt worrn sünd. En Reeg Kinner ut Duhrn is von de Öllern in Kitas in annere Öörd anmellt worrn, von wegen dat de Kita blots fiev Stünnen an’n anbaden hett. Mehr dröff de Kita nich anbeden, anners harrn sik na dat Kindertagesstättengesetz de Regeln ännert, wat sik in de Rüüm in Duhrn nich ümsetten leet.

Lüüd

De Dörpsmidd von Duhrn, Bernhard Fricke, hett twee Böker op Platt rutbrocht.

Literatur

• Willi Wegewitz: Die Urnenfriedhöfe von Dohren und Daensen im Kreise Harburg. 1961
• Bernhard Fricke: Dor güng ick lang. De Smett ut Duhrn vertellt. B. Fricke, Duhrn 1988, ISBN 3-925076-13-1