Beef

In de Spraak vun de Hip-Hop-Kultur is Beef (Utspraak: Bief) en Striet twuschen twee Rappers. Dat Woort kümmt ut de US-amerikaansche Ümgangsspraak un bedutt Striet. Wenn twee Rappers sik in'e Klatten hefft, denn maakt dor faken ok noch annere Künstlers vun jem ehr Label bi mit. Meist gaht se denn över de Medien gegenanner tokehr un bringt ok Musikstücken rut, wo se sik över jem ehren Wedderpart utlaten doot. Tomeist blifft dat dorbi, dat se sik mit Wöör gegensiedig slecht maakt (dissen). Man hen un wenn kümmt dat ok vör, dat se sik mit Gewalt an'e Plünnen gaht. Ok Moord un Dootslag hett dat dor al bi geven.

De meist bekannte Beef in de Geschicht vun den Hip Hop weer de Striet twuschen de Rappers vun de Oostküst gegen de Rappers vun de Westküst (vun Amerika) in de 1990er Johren. Womöglich hangt de Dood vun de beiden beröhmten Rappers 2Pac un The Notorious B.I.G. dor direktemang mit tosamen.

Beefs kaamt in de Hip-Hop-Kultur fökener mol vör. Man dor warrt ok üm streden, ob dat nu dor tohören deit oder nich. En Reeg vun Lüde meent, düsse Beefs geevt en slecht Vörbild för de jungen Lüde af un amenn passeert dor wat, wat een nich mehr bremsen kann. Annere meent, just de Battle-Rap is en wichtigen Bestanddeel vun den Hip Hop un just dor sünd de Singers ok an'n besten bi. Up de anner Siet heet dat avers nich, dat twee Künstlers en Beef hefft, wenn se sik batteln doot. In den Momang vun de Battle sünd de Singers dor woll ganz bi, man achterher hefft se faken gor keen Striet un keen Beef mit'nanner.

Up jeden Fall weert jummers mehr Platten un Mixtapes vun de Wedderparten verköfft, wenn dor en Beef in'e Gangen is. (t.B.: Aggroberlin vs. ersguterjunge )