Weaweblad

t Weaweblad (Plantago) is n geslacht oet de weawebladfemilie (Plantaginaceae) en hef um en noabie 200 oondersoortn dee at oawer de hele wearld vuurkomt. t Geslacht besteet oet weendbestoewers en blöait oarvörmig. Bie de meeste soortn beent de blaadn lieknervig. Hierduur liekt ze wal wat op grös. Bie de meeste soortn in West-Europa stoat de blaadn in nen bladkreenk bie mekoar.

Ze komt in alle soortn umgeewings vuur, mear in Neerlaand beent ze t makkelikst an de kaante van de weg te veendn.

Wat soortn beent tradplaantn. Dèt heult in dèt ze op harte pètte köant oawerleawn, umdèt ze vleazige blaadn hebt, dee at dr teegn köant at dr op etreadn wörd. Aandere soortn gediejt op gröslaande en zoolte groond.

t Weaweblad kan vuur völle middelkes gebroekt wördn. A-j oew an nen braandnettel stekt mu-j met n weaweblad oawer t plekn woer t oew jökket striekn. t Voch oet de blaadn woarket as teegngif teegn t nettelsap. Oet de zöa van wat soortn weaweblad kan psyliumzoad emaakt wördn. Dèt is n middelken teegn lösliewigheaid. As disse zöa met völle voch in enömn wordt, vergoat de zöa neet, en krie-j ne steewige ontlasting. Van wat vukke soortn dit emaakt wörd is neet helemoal duudelik, zowel Plantago ovata, Plantago ispaghula als Plantago psyllium wordt eneumd.

In Neerlaand en België kö-j de volgende soortn antrefn:

Disse naamns beent letterlik umme zat van t Hollaands noar t Tweants, want zovölle oonderskeaid wörd r egee neet emaakt in t Tweants.

Taandweaweblad (Plantago major subsp. intermedia)
Groot weaweblad (Plantago major subsp. major)
Hertsheurnweaweblad (Plantago coronopus)
Roew weaweblad (Plantago media)
Smal weaweblad (Plantago lanceolata)
Zaandweaweblad (Plantago arenaria)
Zeeweaweblad (Plantago maritima)

Neersassies

Drèents:
- hazetarwe (ZOZ, ZWN)
- padtiesblad (ZOZ)
- vetblad (MD)
- viefaoder(n)blad, -kroet, -roet (ZWN)
- weegbree
Grote weegbree:
- laokeblad
Smalle weegbree:
- hazeblad, haze-oren (MD)
Grunnegs:
- waibred (overbliefsel oet t Oldgrunnegs weijbrette)
- weegbree (maist brukenleke benoamen)
Tweants:
- weaveblad
- weaweblad (Riesn)
Veluws:
- wegeblad, wègeblad
- weegbree, wèègbrèè
- wegebree, wègebree
- trekkeblad (Noordwest-Veluwe)

Beukebeskriewing

Meijden, R van der: Heukels' Flora van Nederland. 22ste druk, Grunning 1996
Pelser, P: De ontmanteling van de helmkruidenfamilie (Scrophulariaceae). In: Gorteria, Tijdschrift voor onderzoek aan de Wilde Flora, joar 29 - 5, 20 oktober 2003
Weeda. E.: Nederlandse Oecologische Flora deel 3, 1988