Nazoreeërs

De Nazoreeërs of Nazarenen waren n vrogchristlike-jeudse groep uut t christendom. Dit was n stroming op t vrogge christendom, en der wöd van ezegd dat zi'j drek van de aldereerste gemiente uut Jeruzalem vandan komt. Disse stroming hef bestaone töt de 4e of 5e eeuwe.

Epifanius schref over eur dat t n jeudse sekte waren die vasteheuld an gebruken zo as de Sjabbat en de besniedenisse, mar zi'j geleufden nie an t neudlot of astrologie zo as de aandere jeudse sektes wölken hi'j beschreven. Voolgs Hiëronymus haren zi'j n 'aegen' Evangelie van de Nazoreeërs wölken in t Hebreeuws eschreven was en geleufden zi'j dat de Heilige Geest n vrouwe was en n hemelse 'moe' van Christus. De Nazoreeërs waren te vergelieken met de Ebionieten, umdat zi'j voolgs de Thora leefden, mar aans as Ebionieten, deun de Nazoreeërs wel an de geboorte van Jezus uut de maagd Maria geleuven.

De name

Der wöd al in t boek Haandelings van de Apostels espreuken over Nazarenen of Nazoreeërs, wenneer de Jeudse Raod Paulus ondervrög, nuumden ze n maol de 'sekte van de Nazarenen/ Nazoreeërs', waor as he íéne van de leiders der van waren (Haandelings 24:5). Jezus wöd in t Ni'je Testement 13 maol n Nazarener enuumd (of: 'Jezus uut Nazaret'). Hi'j wördden geboren op Bethlehem, mar verhuusden naor Nazaret (Matteus 2:23). t Kan ween dat he dorumme n Nazarener nuumd wördden. Dissent was later de beduuding ewörden veur de jeudse gemienschap rondum (Jezus) de Nazarener, ofwel: 'Nazareners' of 'Nazoreeërs'. Pas n zet later kwamen de beduding 'christenen' in gebruuk, dat verwezen naor de gemienschap (bestaonde uut jeuden en niet-jeuden) in Antiochië (Haandelings 11:26). Dissent wördden later de beduding veur álle lu die an Christus geleufden.

Nao 70 nao Christus

Op t jaor 70 nao Christus is Jeruzalem en de Tempel met de grond geliek emaakt deur de Romienen an t eande van de Jeudse oorlog. Nao skatting bint der zo'n klaen miljoen dooien evallen. Dit was de tied dat t christendom nog arg jonk was, zo jonk dat de christelike gemiente op Jeruzalem nog eziene wördden as iene van de meerdere jeudse stromings. Zo as hieronder eschreven bint de mennings verdeeld of de Nazoreeërs ok iets te maken had hebt met t daalgaone van Jeruzalem:

De karkva Epifanius döt eur (in de 4e eeuwe) of as n ketterse stroming. As christen kan he de ‘Nazoreeërs’ uut Haandelings natuurlik niet of doe as ketters. Mar, toe as he de stroming van de Nazoreeërs uut zien tied wél wollen verketteren (umdat t ofwek van de orthodoxie umdat zi'j leefden zo as de Thora t veurschreven) zee he mar dat zi'j niet ofstamt van de Nazoreeërs uut t Biebelboek Haandelings van de Apostels. En wol beweren dat disse stroming is onstaone náó t jaor 70 op t 'Overjordaansen' en Syrië.

De christelike historikus Eusebius (eveniens de 4e eeuwe) zeg t weer aans: hi'j schref oons dat de Nazoreeërs uut t Jeruzalem véúr 70 nao Christus (de drekte gemiente umme Jakobus hen dus) bint evlucht naor t 'Overjordaansen'. Nao de verwoesting van Jeruzalem bint n deel weerummekommen naor Jeruzalem, n aander deel hef zich op t aandere laand deurebaenselt en hebt zich verwied over de streek. Daor bint zi'j van uut n beweging binnen t jeudendom töt n jeuds-christelike karke wörden, wölken lös stön van de synagoge.

Dit artikel is eskreaven in et sallandske dialekt van t Vechtdal, in de Algemene Nedersaksiese Schriefwieze.