Bool

Bool (of Bowl) is n gerecht woarbie verschaaidene vruchten ien lutje stukjes sneden worden en soamen ien n schoal doan worden. Hierbie gaait den voak draank, zo as likeur, beernswien of droevenwien. Ook gaait der van oldsheer limenoade ien, aanmengd mit wat woater. Tegenswoordeg zugt man aal meer dat man vruchten oet blik nemt dij al sneden binnen en op siroop stoan, woardeur man t allend nog ien n schoal doun mout en de draank der bie doun hoft.

Ien Grönnen, môr ook op aander steden, wordt bool van oldsheer serveerd op verjoardoagen. As man vrouger ien Grunnen op verjoardag kwam, en bie summege olle luu nog aal, den kreeg man eerst n kopke kovvie mit n plak kouk en doarnoa nog n kopke kovvie of tee mit n gebakje. Doarnoa kwammen den de hapjes op toavel en voak ston der den n schoal bool op t schuddelbred woar man zulf wat oetpakken kon mit n slaif. Tegenswoordeg wordt t ook nog wel eten as toetje, eventuweel mit ijs, veuraal mit de feestdoagen.