Tujuah Pakiah Madinah
| Tujuah Pakiah Madinah |
|---|
Tujuah Pakiah Madinah (bahaso Arab: فقهاء السبعة المدينة, fuqaha as-sab'ah al-madinah) adolah sabuikan untuak sakalompok ahli fiqih dari golongan tabi'in nan marupoan para tokoh utamo ilimu fiqih di Madinah satalah wafaiknyo golongan sahabaik nan iduik sajaman jo Nabi Muhammad. Tujuah Pakiah Madinah mamberi pangaruah nan sabana gadang kapado dasar-dasar dari mazhab Maliki jo Syafi'i.
Namo tokoh
[suntiang | suntiang sumber]Para ulama babeda-beda dalam manyabuik namo katujuah tokoh tabi'in tasabuik, namun pado umumnyo manyabuik sabagai barikuik:[1][2]
- Said bin al-Musayyib (w. 94 H/713 M)
- Al-Qasim bin Muhammad (w. ± 106 H/724 M), cucu Abubakar ash-Shiddiq sarato kamanakan Aisyah bini Nabi Muhammad
- Sulaiman bin Yasar (w. 100 H/718 M) maula Maimunah bini Nabi Muhammad
- Urwah bin az-Zubair (w. 94 H/712 M), adiak Abdullah bin Zubair sartao kamanakan dari Aisyah, cucu Abubakar ash-Shiddiq
- Kharijah bin Zaid (w. 100 H/718 M), anak Zaid bin Tsabit
- Ubaidillah bin Abdullah (w. 98 H/716 M)
- Abubakar bin Abdurrahman (w. 94 H/712 M)
Sabagian ulama ado nan mamasuakan Salim bin Abdullah (w. 106 H/724 M)[3] sabagai salah satu di antaronyo, bukannyo Abubakar bin Abdurrahman. Jumalah kasado tokoh-tokoh nan balainan nan disabuik jo para ulama tamasuak sabagai "Tujuh Fuqaha", kiro-kiro antaro tujuah inggo duo baleh urang. Di antaro katujuah tokoh tasabuik, Said bin al-Musayyib dianggap sabagai nan paliang bapangaruah, diikuti dek Al-Qasim bin Muhammad, Sulaiman bin Yasar, Urwah bin az-Zubair, jo Kharijah bin Zaid.
Peran
[suntiang | suntiang sumber]Sajak jaman Nabi Muhammad masih iduik, para sahabaik Nabi alah mulai dikirim untuak manyebaan agamo di babagai kota nan jauah. Bamukimnyo para sahabaik di kota-kota nan balainan tu kudian manyabaukan muncuanyo pamikiran ukum (fiqih) Islam nan balainan pulo, nan kudian ditaruihkan dek murid-muridnyo nan disabuik golongan tabi'in. Para tabi'in kudian mangambangkan ijtihad ukumnyo (mazhab klasik) surang untuak babagai masaalah baru nan tamui, nan dinisbahkan sasuai kota tampek tinggalnyo; misanyo ado mazhab Hijazi (ahl Al-Hijaz), ado mazhab Iraqi (ahl Al-Iraq), jo ado mazhab Syami (ahl Al-Syam).
Para tabi'in ahli ilimu fiqih Madinah banyak mandapek pangaruah dari para sahabaik gadang, tarutamo antaro lain dari Umar bin Khattab, Utsman bin Affan, Abdullah bin Umar, Aisyah binti Abubakar, jo Zaid bin Tsabit. Satalah para sahabaik gadang tu wafaik, mangko panyebaran ilimunyo dilanjuikan dek tujuah pakiah tasabuik basarato ulama-ulama Madinah lainnyo. Damikian gadangnyo pangaruah para pakiah tu, sainggo akianyo mazhab Hijazi dikana juo jo namo mazhab Tujuah Pakiah.[4]
Para tabi'in senior tasabuik kudian punyo murid-murid panaruih ilimunyo, nan disabuik golongan tabi'in junior. Para tab'in junior nan manaruihkan ilimu tujuah pakiah Madinah, tarutamo antaro lain adolah Ibnu Syihab az-Zuhri, Nafi maula Abdullah bin Umar, Abu az-Zinad Abdullah bin Dzakwan, Rabi'ah ar-Ra'yi, dan Yahya bin Sa'id. Pado akianyo, ilimu hadits jo fiqih para tabi'in junior Madinah tarsabuik ditaruihan lai dek Imam Malik, sarato pado akianyo juo bapangaruah gadang pado muridnyo iyolah Imam Syafi'i. Babagai pandapek dari Tujuah Pakiah arek ubungannyo jo babagai pandapek nan dikaluaan dek Imam Malik, salain itu Imam Malik mariwayaikan juo sabagian gadang hadits dari Tujuah Pakiah dalam kitabnyo Al-Muwaththa. Guru Imam Malik iyolah Abu az-Zinad mangumpuakan babagai pandapek Tujuah Pakiah nan samo (konsensus) dalam bukunyo Al-Mudawwanah; kasamoan pandapek tasabuik basarato hadits-hadits dari Tujuah Pakiah lainnyo dianggap dek Imam Malik sabagai dasar-dasar utamo dari babagai amalan kabiasoan panduduak Madinah (Ijma'/'amal ahlul Madinah). Dek karano itu, para pakiah tasabuik mamberi pangaruah gadang pado dasar-dasar mazhab Maliki dan Syafi'i.[5]
Rujuakan
[suntiang | suntiang sumber]- ↑ Prof. A. Qodri Azizy, Ph.D. Reformasi Bermazhab: Sebuah Ikhtiar Menuju Ijtihab Sesuai Saintifik-Modern. Teraju Mizan. p. 28-29. https://books.google.co.id/books?id=1kOOx5DKUYIC&pg=PA29&dq=7 fuqaha madinah&hl=id&sa=X&ei=FBtLVfPjKYKhugTdqIGACA&ved=0CCAQuwUwAQ#v=onepage&q=7 fuqaha madinah&f=false.
- ↑ Umar F. Abd-Allah (2013). Mālik and Medina: Islamic Legal Reasoning in the Formative Period. BRILL. p. 42-43. ISBN 9789004247888, 9004247882. https://books.google.co.id/books?id=o039LF3JUU0C&pg=PA42&dq=seven jurists medina&hl=id&sa=X&ei=EzVLVbWqG5KTuAS_zIGgCg&ved=0CB8QuwUwAA#v=onepage&q=seven jurists medina&f=false.
- ↑ DR. Ahmad Nahrawi Abdus Salam Al-Indunisi (2008). Ensiklopedia Imam Syafi'i. Hikmah. p. 159. ISBN 9789791142199, 979114219X. https://books.google.co.id/books?id=CUx3N_ZK7jUC&pg=PA159&dq=7 ahli fiqih madinah&hl=id&sa=X&ei=hRFLVaiJJ8O_uATf7YH4CQ&ved=0CB4QuwUwAA#v=onepage&q=205&f=false.
- ↑ Habib Nazir, Muhammad Hasanuddin (2004). Ensiklopedi Ekonomi dan Perbankan Syariah. Kaki Langit. p. 358. ISBN 9789799908100, 9799908108. https://books.google.co.id/books?id=58bXAAAAMAAJ&q=sab'ah fuqaha&dq=sab'ah fuqaha&hl=id&sa=X&ei=oixLVcPPN4eTuASHsID4BQ&ved=0CCkQ6AEwAw.
- ↑ "Fuqaha Sab'ah". Panji Masyarakat. Yayasan Nurul Islam. 34, Masalah 689-696: 53-55. 1991.