Lompat ke isi

Pacu jawi

Wikipedia Minangkabau - Lubuak aka tapian ilimu
Pacu Jawi Pariangan
Rami urang manonton di tapi sawah balanyah

Pacu jawi atau biaso disabuik "balapan sapi" dalam bahaso Indonesia, adolah sabuah atraksi pamainan tradisional nan dilombakan di Kabupaten Tanah Datar, Provinsi Sumatera Barat, Indonesia.[1]

Satiok tahun, lomba pacu jawi iko diadokan sacaro bagilia salamo ampek minggu satiok hari sabtu di ampek kecamatan di Kabupaten Tanah Datar, yaitu Kecamatan Pariangan, Kecamatan Rambatan, Kecamatan Lima Kaum, jo Kecamatan Sungai Tarab.[2]

Pacu jawi alah ado sajak ratusan taun lalu, nan pado mulonyo marupoan kagiatan nan dilakuan dek urang ka sawah sahabih musim panen untuak maisi wakatu luang nan manjadi sarana hiburan sakali untuak panduduak satampek.[3]

Babeda jo karapan sapi di Pulau Madura nan diadokan di lintasan nan kariang, pacu jawi di Kabupaten Tanah Datar diadokan di sawah-sawah balanyah punyo panduduak satampek sahabih panen.[4] Uniknyo, sapasang jawi anyo balari surang tanpa lawan, bukan jo pasangan jawi lawan cando pacuan pado umumnyo, dima panilaiannyo adaloh luruih atau indaknyo sapasang jawi dalam balari, salain panilaian wakatu tampuah lintasan.[5]

Salain tu, kagiatan iko juo dipadukan jo tradisi panduduak satampek, sarupo panampilan tarian jo pamainan alaik musik tradisional. Pacu Jawi marupokan sarana untuak masyarakat taruih melestarikan tradisi dan budaya yang ado. Karano banyak adaik dan budaya yang hilang dan ditinggaan karena tidak lagi dilaksanakan oleh masyarakatnyo.

Asa mulo

[suntiang | suntiang sumber]
Pacu Jawi diadoan di Tanah Datar, Sumatra Barat, Indonesia. Kida: Tanah Datar di Sumatra Barat, Suok: Sumatra Barat di Indonesia.

Pacu jawi diadoan di Kabupaten Tanah Datar, Sumatra Barat, Indonesia.[6] Manuruik adaik, sabuah syaraik daerah nan maadoan pacu jawi adolah Gunuang Marapi harus tampak jaleh.[6] Gunuang satinggi 2.891 meter iko dipicayoi adolah asa urang Minangkabau nan kini mandiami Sumatra Barat.[6] Panduduak satampek nan bakarajo ka sawah, maadoan acara iko katiko sawah alah kosong sasudah dipanen dan sabalun mulai musim batanam salanjuiknyo.[6] Lokasinyo baganti-ganti antaro babagai nagari di Tanah Datar.[6] Nagari-nagari iko talatak di ampek kecamatan nan sacaro adaik marupoan panyalanggara pacu jawi, yaitu Sungai Tarab, Pariangan, Limo Kaum, jo Rambatan.[6][7]:2 Kaampek kecamatan iko tadiri dari 26 nagari (pado 2014) nan talatak di katinggian antaro 550-700 meter, total sawah 96,16 km² dan labiah dari 12.000 jawi (data tahun 2012).[8]

Pacu jawi alah tasalanggara samanjak baabaik-abaik lalu, tamasuak sabalun kamardekaan Indonesia, dan bamulo dari parayoan jo hiburan panen untuak urang-urang di kampuang.[9][6] Dulunyo, acara iko hanyo diadoan duo kali satahun, tapi siklus panen nan samakin pendek mamungkinkan acaro iko tasalanggara labiah acok lai.[6] Pado taun 2013, nagari-nagari Tanah Datar bagilia maadoannyo satiok duo bulan, dan tiok giliran tadiri ateh ampek acara nan diadoan pado Hari Rabaa atau Satu.[6]

Pamainan

[suntiang | suntiang sumber]
Jawi balari di lintasan di mungko panonton.

Walaupun namonyo pacu jawi, acara iko sabananyo indak lomba adu kancang lari jawi.[6] Satiok nan sato, yaitu sapasang jawi nan dikandalian dek surang joki, tiok nan sato balari sacaro bagilia di sabidang sawah.[6] Jawi nan digunoan adolah jawi jantan baumua 2 inggo 13 taun, balari bapasangan bakabek ka sabuah alaik bajak dari kayu, tampek sang joki tagak.[6] Lintasan pacuan adolah tanah baluluak dari sawah nan alah kosong sasudah dipanen.[6][10] Babagai sumber (nan mancaliak acara pacu jawi pado kesempatan babeda) manyabuik panjang lintasan nan babeda-beda, mulai dari 60 meter,[6] 100 meter,[8] hinggo 250 meter.[10] Luluak di lintasan pacuan dapek mancapai kadalaman 30 cm.[6] Jawi-jawi iko talatiah untuak mulai balari katiko diagia aba-aba yaitu katiko alaik bajak nan takabek alah manganai tanah jo dipijak saurang.[6] Sang joki dapek tagak jo mangandalian jawi-jawi iko jo caro mamacik ikua kaduo jawi tasabuik, indak manggunoan palacuik.[6][11] Tali nan mangabek kaduo jawi iko dibuek lungga, sainggo jawi-jawi tasabuik acok balari jo arah atau jo kacepatan nan babeda. Sang joki dituntuik untuak mangandalian sapasang jawi bia indak bapisah sarato jo dapek balari luruih sampai ka ujuang, sambia bausaho bia si joki tasabuik indak tajatuah.[11]

Saurang joki manggigik ikua jawinyo bia dapek balari kancang.

Urang-urang nan manonton, nan acok tamasuak palancong lua nagari, manonton acara iko dari tanah kariang di pinggia sawah.[6] Bagian dari atraksi acara iko adolah tingkah jawi-jawi nan payah diarahan, sainggo joki acok jatuah atau musti bamanuver untuak mampatahankan diri sarato maarahkan jawi-jawi.[11] Kadang sang joki manggigik ikua salah satu jawinyo bia balari labiah kancang (tarutamo katiko jawi tasabuik labiah lambek dibandiangkan jo pasangannyo).[11] Luluak dapek tapacak ka sumbarang tampek, tamasuak ka arah urang nan manonton.[6] Kadang jawi malah babelok arah dan malah balari ka arah urang nan manonton.[6] Indak jarang tajadi cidera, utamonyo tukang-tukang joki.[10] Indak ado pamanang nan dinyatoan sacaro resmi, tapi urang-urang nan manonton umumnyo manilai jawi-jawi iko diliek dari kancang larinyo, kakuatan, jo kamampuan balari nan luruih.[6] Manuruik tradisi, kamampuan balari luruih iko baguno untuak maajaan filosofi baso nan paliang dapek diharagoi, indak hanyo untuak jawi tapi untuak manusia, adolah nan dapek maikuti jalan nan luruih.[6][12] Mampunyoi jawi nan dianggap tangkeh dalam pacu jawi adolah sumber kabanggaan dek panduduak satampek. Salain itu, jawi-jawi nan dinilai rancak dek urang nan manonton dapek maningkekan nilai juanyo inggo duo atau tigo kali lipek dari harago biaso.[6][11] Kauntuangan finansial iko adolah salah satu motivasi nan sangaik baguno untuak urang-urang nan sato bapacu.[6]

Sabuah acara paju jawi dapek diikuti ratusan jawi, baiak jawi nan dari nagari tuan rumah maupun dari nagari-nagari lainnyo.[6] Dinas Pariwisata Tanah Datar kini manyadioan dana jo truk untuak maangkuik jawi. Sabalun campua tangan pamarintah, urang-urang nan sato bapacu jo kawi-jawinyo dapek bajalan kaki inggo 50 kilometer (acok inggo samalaman).[6] Katiko acara balansuang, jawi-jawi nan indak sadang bapacu dikabekan di sabidang tanah, biasanyo dakek garih finis.[8] Adonyo jawi-jawi iko dipicayoi mambantu jawi nan sadang bapacu untuak labiah capek, dek taragak bakumpua jo kawanannyo.[8]

Alek

[suntiang | suntiang sumber]

Acara pacu jawi diiriangi jo sabuah alek nagari nan disabuik alek pacu jawi.[6][13] Alek iko acok malibaikan jawi nan basuntiang (hiasan kapalo khas Minangkabau),[13] pamainan musik sarupo gandang tasa jo talempong pacik,[13] tari piriang,[6] pasa kaget,[6] pamainan tradisional,[6] panjek pinang,[6] jo lomba layang-layang. Sabalun campua tangan pamarintah, panduduak satampek baiyua untuak manangguang kasado biaya acara, tapi kini sabagian biaya ditangguang dek Dinas Pariwisata Tanah Datar.[6]

Aksi lari kancang, luluak nan batabangan, sarato ekspresi tukang joki nan khas (ateh) manjadian pacu jawi sabagai objek nan disukoi fotografer-fotografer (baruah).[14]

Fotografi

[suntiang | suntiang sumber]

Pacu jawi maimbau minaik fotografer nasional maupun internasional, dan sabagian foto dari acara iko alah mamanangkan babagai lomba foto.[14] Faktor nan manambah daya tarik fotografi dalam acara iko di antaronyo aksi lari kancang, pacak luluak nan batabangan, sarato postur jo ekspresi wajah tukang joki nan khas.[14] Salain itu, Tanah Datar dikana juo jo panorama alamnyo, tamasuak Gunuang Marapi, daerah babukik-bukik, utan rimbo, sarato sawah-sawah.[14] Untuak maambiak foto nan rancak, fotografer-fotografer ko acok mandakek ka lintasan, dan maambiak risiko takanai luluak atau ditundo jawi.[15] Foto-foto pacu jawi alah manarimo babagai panghargaan sarupo World Press Photo of the Year, Hamdan International Photography Award, sarato Digital Camera Photographer of the Year dek koran The Daily Telegraph.[16][17]

Caliak pulo

[suntiang | suntiang sumber]
Search Wikimedia Commons Wikimedia Commons mampunyoi
media nan bahubuangan jo
Pacu jawi

Rujuakan

[suntiang | suntiang sumber]
  1. ↑ berita.liputan6.com Pacu Jawi, Karapan Sapi Khas Minang. Diakses pada 6 November 2011.
  2. ↑ http://www.sitinjaunews.com Archived 2019-08-30 di Wayback Machine. Ribuan Masyarakat Saksikan Pacu Jawi Di Tanah Datar[pranala nonaktif permanen]. Diakses pada 6 Noveber 2011.
  3. ↑ bali.antaranews.com Sapi Hias Dilombakan di Alek Pacu Jawi. Diakses pada 6 November 2011.
  4. ↑ http://www.payakumbuhkota.go.id Archived 2010-04-20 di Wayback Machine. Pacu Jawi Archived 2021-07-27 di Wayback Machine.. Diakses pada 6 November 2011.
  5. ↑ http://www.indonesia.travel/id Pacu Jawi di Sumatera Barat: Berpacu Kencang Sambil Menggigit Ekor Sapi. Diakses pada 6 November 2011.
  6. ↑ a b c d e f g h i j k l m n o p q r s t u v w x y z aa ab ac ad ae af Febrianti (2013). "Pacu Jawi: Balari mangaja harago tinggi". di dalam Rita Nariswari et. al.. Atraksi Budaya Nusantara. Pusat Data dan Analisis Tempo. https://books.google.com/books?id=ugxfDwAAQBAJ&lpg=PT4&vq="Pacu Jawi"&dq=pacu jawi&pg=PT4#v=onepage&q&f=false. 
  7. ↑ Suzanti, Purnama (2014). "Dayo pikek Pacu Jawi sabagai atraksi wisata budaya di Kabupaten Tanah Datar". Jurnal Nasional Pariwisata. Yogyakarta: Tourism Study Center, Gadjah Mada University. 6 (1): 1–7. doi:10.22146/jnp.6869. ISSN 1411-9862. 
  8. ↑ a b c d Suzanti 2014, hlm. 3.
  9. ↑ Suzanti 2014, hlm. 1–2.
  10. ↑ a b c "Wet and wild: Indonesia mud bull races not for faint of heart". Gulf News. 2018-12-04. 
  11. ↑ a b c d e Theodore Salim (2018-09-07). "Padang: Pacu Jawi Festival". TravelBlog. Expedia. 
  12. ↑ Suzanti 2014, hlm. 2.
  13. ↑ a b c Nyoman Budhiana, ed. (2011-10-02). "Sapi Hias Dilombaan di "Alek Pacu Jawi"". Antara. 
  14. ↑ a b c d Suzanti 2014, hlm. 5.
  15. ↑ Suzanti 2014, hlm. 4.
  16. ↑ "Joy at the end of the run: Sports Action, first price singles". World Press 2013 Photo Contest. World Press Photo. 2013. 
  17. ↑ "Digital Camera Photographer of the Year 2009 winners". The Telegraph. 2009. 
Diambiak dari "https://min.wikipedia.org/w/index.php?title=Pacu_jawi&oldid=3151054"