Arizal
Arizal marupokan salah surang wartawan sakaligus sutradara film Indonesia nan badarah minang. Baliau adolah anak dari pasangan H. Ibrahim Sidi Mangkuto dan Hj. Matayam M. Yasin nan barasa dari Padang Panjang. Baliau lahia di Riau pado tanggal 11 Januari 1943.
Arizal manampuah pandidikan di kota Pekanbaru, Riau. Baliau manamaikan SMA pado tahun 1962. Salamo tingga di Pekanbaru, baliau tahituang aktif bakagiatan di dunia seni. Baliau tacatat sabagai pamain orkes "Singgalang Ria" nan pernah mairiangan panyanyi legendaris Minang yaitu Elly Kasim.
Samanjak tamaik SMA, Arizal mulai mangambangan sayok di dunia nan baliau tekuni. Untuak manunjang bidang nan baliau tekuni, baliau pindah ka Jakarta satahun sasudah baliau tamaik SMA, yaitu pado tahun 1963. Baliau karajo di babarapo perusahaan panerbitan majalah. Baliau mamulai karir yaitu sabagai karikaturis pado majalah "Selecta" dan sakaligus manjadi redaksi majalah "Mayapada" pado tahun 1969 sampai tahun 1970. Satahun sasudahnyo, yaitu pado tahun 1970 sampai 1972 baliau manekuni hal nan samo di majalah "Panorama".
Arizal mulai masuak dan manekuni dunia pafilman katiko baliau alah manyalasaian pandidikan di West Coast Institute of Management & Technologi di Perth, Australia. Baliau sempat magang di Walt Disney Universal Studio Los Angeles, Amerika sabagai asisten artistik pado tahun 1968 sampai 1969.
Arizal mulai mandapekan kapacayoan untuak manjadi sutradara di Indonesia pado film anak-anak "Senyum dan Tangis". Ateh karajo kareh dan katekunan baliau tahadap garapan, baliau mandapekan hasil nan sangaik mamuaskan. Baliau berhasil mandapekan penghargaan Piala Citra pado tahun 1974 pado kategori film anak-anak terbaik.
Sairiang bajalannyo waktu, Arizal mulai banyak di sorot dek urang-urang dan banyak pihak nan nio maajak baliau untuak bakarajo samo pado garapan-garapan tatantu. Salah satunyo baliau diajak bagabuang dan sakaligus manjadi sutradara film komedi takamuko di Indonesia, yaitu "Warkop DKI". Berkat kepiawaian baliau, film nan baliau sutradarai tasabuik sukses dan meledak di pasaran. Salain itu film tasabuik bisa ditarimo dek masyarakaik Indonesia.
Sasudah film partamo Arizal sukses di pasaran, baliau sukses manjadi salah satu sutradara film-film komedi di Indonesia. Baliau tacatat alah manyutradarai lebih dari 52 judul film di babagai rumah produksi dan 8 judul sinetron nan ditayangan dalam ratuihan jumlah episode pado stasiun TV swasta nan ado di Jakarta.[1]
Arizal pernah juo bakarajo samo jo pamain film tanamo di Indonesia diantaronyo Yessy Gusman, Rano Karno, Yenny Rachman, Roy Marten, Lydia Kandou. Salah satu serial TV nan baliau sutradarai adolah "Jin & Jun". [1]
Sasudah kesuksesan nan Arizal dapekan, baliau tak luput dari nan namonyo maut. Baliau maningga pado tanggal 18 Mei 2014 dalam umua 71 tahun di Bekasi, Jawa Barat. Namun baliau tetap dikenang dek masyarakaik Indonesia sabagai salah satu sutradara talaku jo tamaha Indonesia. [2]