Oncovirus
|
Quest articol chì l'è scrivud in lombard, con la Noeuva Ortografia Lombarda |
Un oncovirus, o anca virus oncogen, a l'è un virus che l'è bon de fà vegnì el cancher. El termen l'è nassud in tra i agn '50 e '60 per parlà di retrovirus assee mutagen, ma al dì d'incoeu l'è doperad senza distinzion.
La gran pupart di virus la causa minga el cancher, se pensa per via de la longa co-evoluzzion in tra de lor e i ospit: el studi de quei poch che 'l fann el serviss no domà a nivell de epidemiologia ma anca per capì mej el ciclo cellular, 'me che l'è stad fad con la proteina del retinoblastoma.
L'Organizazzion Mondiala de la Sanità la stima che, in del 2022, i infezzion hann menad al 17,8% de tucc i cancher, con domà set patogen che n'hann fad el 11,9%. Un studi del 2020 in su 2'658 cas de cancher de 38 tipi diferent l'ha mostrad che el 16% l'era sociad a un virus. Despess 'sti cancher chì poden vesser prevegnud ben cont i vacinazzion o comunque identifegad con di test del sangu.
I virus oncogen pussee spantegad in l'om inn el papillomavirus uman, i virus de l'epatita B e C, el virus de Epstein-Barr, el virus T-Linfotropegh uman, l'herpesvirus sociad al Sarcoma de Kaposi e 'l poliomavirus Merkel cell. Dacc sperimentai hann mostrad come 'sti virus chi inn el segond fator de ris'c tumoral di omen, apena dree al tabach.