Mercoldé

Chest artícol a l'è scricc in Lumbàrt, ortograféa bresàna moderna.

El Mercoldé (o Mercordì) l'è giü dei dé de la setemàna, el vé dòpo del Martedé e prìma del Giöedé.

El nòm Mercoldé el vé del Latì Mercurii dies, che völ dì dé de Mercüre, che l'éra 'na divinità per i antìchi Romà. Quàze töte le lèngue neolatìne le derìa 'l sò nòm a la stésa maniéra: Mercredi 'n Fransés, Mercoledì 'n Italià, Miércoles en Spagnöl, Dimecres en Català, Miercuri 'n Ruméno ecc, En Portoghés envéce l'è ciamàt Quarta Feira che significarès quàrt dé. Apò a 'n Galés (Dydd Mercher) e 'n Albanés (e Mërkurë) el nòm el vé del Mercùrio latì.

Per le lèngue germàniche 'nvece, el nòm el derìa quàzi sèmper del dio Wodan (Odìno) che ai tép dei antìchi Romà l'éra ac amò asociàt a Mercùrio. Isé 'ndèle lèngue germàniche el Mercoldé l'è ciamàt Wednesday 'n Inglés modèrno e Wēdnes dæg 'n Inglés antìc, Oðinsdagr en Norvegés antìc, Onsdag en Danés, Norvegés e Svedés, Woensdag 'n Olandés, ecc, En Todèsc envéce l'è ciamàt Mittwoch, che völ dì metà setemàna.