Galvan Fiama
|
Quest articol chì l'è scrivud in lombard, con la Noeuva Ortografia Lombarda |
.png)
El Galvan Fiama (in latin Galvanus o Galvagnus; Flamma, de Flama o de la Flamma: Milan, 1283 - Milan, 1344) a l'è stad un fraa domenegan lombard, capellan del Giovann Vescont e scritor de croneghe de l'area milanesa e del so ordin religios.
Biografia
[Modifega | modifica 'l sorgent]Lauread in teologia dopo vesses fad fraa al convent de Sant Ustorgg, l'ha insegnad la materia ai student de medesina de Pavia, a stà de cà in del convent de San Tomas, e lilinscì la nass la soa passion per la storia. El torna a Milan per el 1313 e l'insegna filosofia moral, e 'l scriv inscì el so unegh tratad teologegh, Tractatus yconomicus.
El descompariss de Milan del 1323, forsi per l'interdet dad foeura contra la cità del Papa, e 'l compariss ancamò in di ducument de 'n process de inquisizzion a Bologna del 1330, l'ann midem el torna a Sant Ustorgg a ocupàss de storia. El sarà protagonista del cusì torna i relazzion in tra l'orden di fraa predicator e i Vescont dopo di vari process per eresia contra la familia milanesa: anca se se pensa che l'habia esagerad el so roeul in di so croneghe, el facc che 'l fuss deventad bon amis de l'Azzon e confessor del Luchin e del so fioeul el mostra che l'è stad debon bon de menà vesin i domenegan e i Vescont.
La soa ultima oeuvera, la Chronica Maior, la finiss del 1344, che donca l'è scernuda per convenzion 'me data de la soa mort. In d'una soa oeuvera, che l'è stada minga dada foeura, el tira a man la Marklandia, a ovest de la Groenlandia, gh'è di studios che sostegnen che 'l parlava de l'America, roba che di navegador genoves havarien podud savè di scandinav.