Caloss de Bressa
El Caloss (latin: Calogerus; Bressa, ... - Albenga, 18 de april del 121) l'è staa on soldaa roman, marter ai temp de l'imperador Adrian.
La vita
[Modifega | modifica 'l sorgent]La soa storia l'è cuntada su in di att di sant Faustin e Giovita; bressan, el Caloss el s'era convertii al Cristianesim dopo d'avè scoltaa quei duu sant. Anca lor, de fatti, eren duu soldaa che vegneven de Bressa. Tucc e trii hinn staa menaa a Milan per vess processaa. Nissun de lor l'ha abiuraa la fed noeuva, e donca hinn staa condannaa a mort.
Menaa foeura di mur de la città, arent a l'Arena, hinn staa ligaa a on carr, cont i cavai che correven a s'ceppacazzuu. Ma i trii sant hinn staa bon de governà i carr, e scappà via. El Caloss alora l'è andaa invers a Vigeven, e de là fina a Ast: lainscì l'ha convertii el San Segond (incoeu patronn de la città), che poeu l'è andaa a Milan a daggh ona man a Faustin e Giovita.
Inveci el Caloss l'è andaa a Albenga (anca se se sa minga el perchè), e anca lì l'ha predicaa el Vangeli. Descovert, gh'hann tajaa el coo.