Attentaa a la Rambla de Barcelona del 2017

Quest articol chì l'è scrivuu in lombard, grafia milanesa.

El 17 de agost del 2017 a gh'è staa on attacch terroristich in la Rambla de Barcelona cont investiment de part de on forgon e 'n toeu di ostagg in d'on restorant e on para de event ligaa che han menaa a 16 mort e 130 ferii.

Dinamica

Ai or 16:45 del 17 de agost 2017 on forgon FIAT Talento bianch el mett sotta di gent e 'l sò sciaffoeur el sortiss armaa e 'l va in d'on bar turch e 'l toeu di ostagg.

Pocch menut dopo la polizia catalana la fa on'operazion importanta per protegg i alter locai e i cittadin.

A hinn saraa di stazion comé Catalunya, Passeig de Gràcia, Paral·lel, Universitat e Drassanes.

Pocch prima di 19:00 i Mossos confermen la natura terroristica di attacch e l'è trovaa on segond forgon, che 'l gh'eva de vess doperaa per scappà.

Rapport cont i esplosion

A gh'è staa lilinscì arent, ad Alcanar, ona esplosion di bombol del gas el dì prima. El par che l'obiettiv di terrorista el fuss de fà s'cioppà i forgon impienii de gas, ma i bombol a hinn s'cioppaa prima e han faa passà a l'investiment 'me metod de attacch.

Attentaa a Cambrils

A gh'è staa poeu on alter tentaa attacch a Cambrils, cont 5 terrorista armaa de cintur esplosiv fermaa e mazzaa di Mossos. Han provaa anca lor a investì la gent, ma han mazzaa nissun subit, anca se poeu ona donna spagnoeula a l'è morta.

Autor

L'ISIS l'ha revendicaa l'attacch ona quaj ora dopo che l'è staa faa.

El forgon a l'è sta nolegiaa a Ripoll de on marocchin cont di precedent penal, che però appena l'ha vist la soa foto l'è andaa a la Polizia. L'omm a l'è staa fermaa e l'ha dii che i sò document eren staa robaa del fradell Moussa Oukabir, effettivament coppaa a Cambrils.

El sciaffoeur effettiv a l'è staa identificaa in Younes Abouyaaqoub, mazzaa a Subirats el 21 de agost di Mossos.

I vittim

L'attentaa l'ha faa 16 mort e circa 130 ferii.

Vittim per nazionalità
Nazionalità	Mort
Spagna	5
Italia	2
Portogall	2
Belgi	1
Canada	1
Stat Unii	1
Germania	1
Italia/ Argentina	1
Spagna/ Argentina	1
Australia/ Regn Unii	1
Total	16

Reazion

Sia la sindega Ada Colau che el President Carles Puigdemont han nulaa i sò vacanz per tornà in la città.

I ospedai catalan han taccaa a domandà el sangh per gestì l'emergenza.

Anca el premier spagnoeu Mariano Rajoy l'ha faa ona deciarazion de support ai barcellones, seguida de 'n tweet del Re de Spagna.

A nivell internazional Donald Tusk, Donald Trump e Paolo Gentiloni han daa la sò solidarietà

In del Twitter s'hinn spantegaa l'hashtag #TodosSomosBarcelona e #OrgullBarcelona, e in di profil ligaa a l'ISIS gh'è staa di festeggiament.

La Catalogna l'ha deciaraa trii dì de lutt.

Riferiment