Agnell de Dia
|
Quest articol chì l'è scrivud in lombard, con la Noeuva Ortografia Lombarda |
Agnell de Dia (Agnus Dei in latin) a l'è 'n espression evangelega tolta del Vangeli de Giovann doperada per parlà del Gesù Crist in del so vesser la vitima espiatoria per la redenzion di pecad di omen.
Quell'espression chi l'ha menad anca a 'na representazzion artistega e araldega ben spantegada in del mond: quella de l'agnell de Pasqua, che se troeuva in stema sacher, tant 'me quei di diocesi de Chengdu, Paterson, Dresda-Meißen, Ripon, Bolzan-Barsenon e Visby, e civil, per esempi quell de Benissanó, Kleszczele, Barsenon, Třebešov, Alsergrund, Český Jiřetín, Rouen, Riva presso Chieri, Niederrohrdorf e 'l quarter londines de Barnet. Gh'è anca di unità militar che 'l doperen, tant 'me el Comand Militar di Gotland svedes. L'è anca el simbol tradizzional di Moravian.
Desgià che la fras l'è stada dida del Giovann Batista, despess l'Agnell l'è mostrad con lu. In del rit roman a l'è anca el nom de 'n orazzion che se dis intant che gh'è la frazzion del pan, inscì de domandàgh el perdon di pecad: in la messa tridentina inveci se dis dopo, menter in del rit ambrosian se dis no. I anglican el capita che la canten intant che l'è dada la comenion.
Riferiment
[Modifega | modifica 'l sorgent]Alter proget
[Modifega | modifica 'l sorgent]
Wikimedia Commons el gh'ha dent imagin o alter archivi su Agnell de Dia