Efesit Capitel Quater

Quel articul chì l'è scrivüü in Lumbard, cun l'urtugrafia insübrica ünificada.

Efesit

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Quater

¹Dunca, v'esurti mì, el presunee in del Signúr, a caminà degnamént de la ciamada al qual sii staa ciamaa, ²cun tüta ümiltaa e gentiléza cun paziénza, supurtand el vün l'alter in del bén, ³fasend prèssa a tegnì l'ünitaa del spirit in del ligamm de la pas: ⁴vün corp e vün spirit, cumè anca sii staa ciamaa in de vöna speranza de la vostra ciamada:
⁵vün Signúr, vöna féd, vün batesim,
⁶vün Diu e pader de tücc,
che l'è sü tüsscoss, travèrs tüsscoss e in de tüsscoss.
⁷E a ognidün de nümm l'è stada dada la grazia segund la misüra del regall de Crist. ⁸Dunca, el dis:
«Despö che l'è naa sü a l'alt l'ha ciapaa i presunee
e l'ha daa regaj a i vèss üman».
⁹E che cossa l'è «naa sü», se no che anca l'è naa giò a i part püssee bass de la tèra? ¹⁰Lü medemm che l'è naa giò l'è anca lü che l'è naa sü sura de tücc i cél, perchè l'impiena tüsscoss. ¹¹E lü l'ha daa i apostul, prufètt, vangelist, pastúr e insegnant, ¹²per el fà cumplètt di sant a un laur de ministeri, al fà sü del corp de Crist, ¹³fin che nümm tücc sèmm riaa a l'ünitaa de la féd e de la cugnussénza del fiöö de Diu, a un omm perfètt, a una misüra de la statüra de la pienéza de Crist, ¹⁴perchè sium pü infant, slanzaa di und e purtaa in gir d'ogni vént d'insegnamént in del sfrus di vèss üman, in de la fürbizia a la falsitaa de l'errúr, ¹⁵ma disend la veritaa in del bén cressarìum in de tüsscuss vèrs lü, che l'è 'l cuu, Crist, ¹⁶del qual ogni corp l'è incurnisaa e ünii insèma, travèrs i giünt de suport segund el funziunamént in de la misüra d'ogni vöna part el fa la cressida del corp al fà sü de sé medemm in del bén.
¹⁷Dunca, disi chèst e tecti in del Signúr, che vialter caminii pü cumè anca i naziún caminen in de la vanitaa di lur mént, ¹⁸che hinn faa scür in de la mént, alienaa de la vita de Diu per via de l'ignuranza che l'è in de lur, per via de la düréza del lur cör. ¹⁹I quij che, devegnüü sénza sèns, s'hinn cunsegnaa a la spüduratéza al laur d'ogni impüritaa in de la piögeria. ²⁰Ma vialter avii minga imparaa Crist inscì. ²¹Se gh'avii sentii e sii staa insegnaa in de lü, cumè l'è la veritaa in de Gesü, ²²per mètev via la vegia persona del cumpurtamént prima che l'è curota per mèzz di desidéri de l'imbröj, ²³e per vèss faa növ in del spirit de la vostra mént, ²⁴e per vestìv la növa persona che l'è creada segund Diu in de la giüstizia e la santitaa de la veritaa.
²⁵Dunca, metüü via la bala, parlee la veritaa, ognidün cunt el sò prossim, perchè sèmm member el vün di alter. ²⁶Gh'avarìuv l'ira e pecarìuv no: el suu el andarìa no giò sü la vostra futa, ²⁷né dee lögh al diàul. ²⁸Lü che 'l grata el gratarìa pü, ma pütost el travajarìa, laurand el bén cunt i sò man, perchè 'l gh'àbia quajcoss de dà a lü che 'l gh'ha besogn. ²⁹Nissüna parola cativa la andarìa föra de la vostra buca, ma se l'è quajcossa bona del besogn per el fà sü, perchè 'l daga grazia a quij che senten. ³⁰E fee no trist el Spirit Sant de Diu, cunt el qual sii staa segnaa cunt un sigill per el dì de la redenziún. ³¹Ogni maréza, ira, ràbia, giguj e biastemada la turìa via de vialter cun tüta la malizia. ³²E sarìuv el vün cunt i alter géntil, gh'avarìuv cumpassiún, ve perdunarìuv, propi cumè anca Diu in de Crist el v'ha perdunaa.

Navigaziun

• ← Indree a Capitel Trii
• Inanz a Capitel Cinch →
• A l'indes