Luçian Borzon

ZE-P	Sta paggina chie a l'è scrita in zeneize, co' ina grafia tipo quella do Prian do 1745

Luçian Borzon (Zena, 1590 - 1645), pittô e incizô zeneize.

Luçian Borzon

Frontispiççio do Borzon pe-i encommi a-o duxe Zorzo Çentrion (Pavon, 1622)

Dæti personâli

Nàscita: Zena, 1590
Mòrte: Zena, 1645

Âtre informaçioìn

Profesción: pitô incizô

Biografia

Figgio de Scilvestro e Vionica Bertolotta, o fu inandiao da-a famiggia a-i studdi lettiai ch'o l'abandonò in favô da pittua, influençao da-a so frequentaçion do barba pittô, Feipo Bertolotto.

O frontispiççio do Borzon pe-a Çittara zeneize, 1636

Graççie a l'interesse de l'Alberigo I Cybbo-Maaspiña, prinçipe de Massa, o l'intrò a-a scœua do Çezao Corte. O conobbe o Giancarlo Doia, pe-o quæ o realizzò varrie œuvie e ch'o seguì, in gio a-o 1614 a Milan comme consulente d'arte. Inta çittæ meneghiña o Borzon o vègne a contatto con l'arte lombarda do Seiçento e o riçevette numioze commiscioin.

Tornao a Zena, o l'arvì buttega pe conto so, specializzandose into ritræto, de formato grande e picin.

O fu amigo do Benardo Castello e do Gabriælo Ciabrea.

Doî so sunetti in lengoa zeneize (Se Ballin piggia in man ro sigorello e L'anno chi ne pareiva unna trattuga) fun pubricæ inte l'arecugeita do Cavallo do 1636, da quæ o decorò ascì o frontispiççio.

Spozaose co-a nessa do meistro de muxica Giœumo Moælo, o l'ebbe trei figgi, tutti trei pittoî: Françesco, Giambatista e Carlo. Tra i so allevi, otr'a-i figgi, en da mençunâ Giambatista Monte, Gioachin Axao, Scilvestro Gexa e o Baciccia Gaolo.

O moì cazendo da 'na scaa dementre ch'o l'ea aprœuv'a finî o "Prezeppio", conservao inta capella da Madonna di Angei da baxillica da Santiscima Nonçiâ do Vastao in Zena.

Coixitæ

Tant'a doveiva ese a nominata do Borzon a-i so tempi, che (à giudicâ da 'na compoxiçion bernesca de l'eppoca) quandœ-un o l'ea becco se ghe diva ch'o g'aiva de cornixe in testa che manco in quaddro do Borzon.

Galeria

• 
  O Batæximo de Criste, Palaççio Gianco
• 
  Frontispiççio pe-i Oraçioin do Mascardo, 1622
• 
  Ritræto do Giœumo Gallo, muxico da capella ducâ de Zena, Palaççio Gianco
• 
  Ritræto d'ommo
• 
  Ritræto d'ommo (in po sbrincio)
• 
  S.Hieronym

Atri progetti

Altri progetti

• Wikivivàgna
• Wikimedia Commons

• Wikivivàgna a contêgne una pàgina dedicâ a Luçian Borzon
• Wikimedia Commons a contêgne di files in sce Luçian Borzon