Zierikzee

Dit artikel is gesjreve (of begós) in 't Venloos. Laes hie wie v'r mit de versjillende saorte Limburgs ómgaon.

Zierikzieë (Zieëws: Zurrikzeê) is 'n stad in de gemeinte Schouwen-Duiveland in de Nederlandse provincie Zieëland. De stad telt óngevier 11.500 inwoeëners en is de houfplaats van de gemeinte.

Historie

In 976 kump Zierikzieë ónder de naam Creka (kreek) veur in 'n oorkonde waorin de Sint-Baafsabdie door keizer Otto II wuurt bevestig in eur bezittinge. De naam Zierikzieë kump veur 't iers veur as Siricasha, in 'n oorkonde oet 1156.

In 1248 woorte de stadsrechte van Zierikzieë door graof Willem II van Holland bevestig en oetgebreid. De ierste stadsrechte woorte verlieënd tösse 1217 en 1220, maar de preciezen datum is neet bekend. Aan 't ind van de middelieëwe waas Zierikzieë 'n belangrieke plaats in Zieëland en umgaeving.

In 1303 en 1304 woort de stad mierdere maole belegerd door Vlaamse troepe ónder begeleiding van Gwijde van Namen. De Vlaminge slaogde d'r neet in Zierikzieë in te neme en waore oetintelik verslage in de Slaag beej Zierikzieë op 11 augustus 1304. In 1466 vónd in Zierikzieë 'ne groeëte stadsbrand plaats dae ein derde van de stad in d'n as had gelag.

In d'n Tachtigjäörigen Oorlog woort Zierikzieë op 8 augustus 1572 door de geuze ingenaome. In september 1575 landde Spaanse troepe op Schouwen en Duiveland en versloge doe de geuze tiedes 't Beleg van Zierikzieë. De stad goof zich euver op 29 juni 1576, maar veer maonde later óntstónd d'r gedeuns ónder de Spaanse soldaten waeges achterstallige betalinge, waonao de Spanjaarde vertrókke.

Tiedes d'n Ierste Waereldoorlog woorte op 30 april 1917 door 'n verdwaalde Britse piloot zes bómme op de stad gewórpe. De piloot had Zierikzieë verward mit Zeebrugge; d'r vele dreej doeëje. Nao d'n Twieëde Waereldoorlog woort de stad iers in oeëstelike richting oetgebreid mit Plan Malta, daonao mit d'n bouw van de wiek Poortambacht (Plan West) in westelike richting.

In 1997 woort de gemeinte Zierikzieë ónderdeil van de groeëtere gemeinte Schouwen-Duiveland. 't Gemeintehoes van dees gemeinte steit aevel waal in Zierikzieë. Dit gebouw is 'n architectonisch hoeëgstendje dat geënt liek te zien op 't Guggenheimmuseum in Bilbao, Spanje. 'n Kenmerk d'rvan is det 't t'r huul erg op liek daodet 't nao baove toe breijer oetlöp.

Gebaore in Zierikzieë

Pieter Caland (1826-1902), waterbouwkundige (ouk óntwerper van de Nieje Waterwaeg)
Wim van den Doel (1962), geschiedkundige (hoeëglieraar)
Marcel Dost (1969), meerkamper
Hendrik Albert van IJsselsteyn (1860-1941), ambtenaer en minister (nao um is euveriges 't dörp Ysselsteyn verneump gewaore)
Johannes Cornelis de Jonge (1793-1853), politicus, archivaris en geschiedschriever
Marinus Willem de Jonge van Campensnieuwland (1786-1858), advekaot, rechter en politicus (hae waas ó.a. minister)
Carel Joseph van Kempen (1872-1955), ambtenaer en politicus
Adrie Koster (1954), vootballer en vootbaltrainer
Abraham Johannes Muste (1885-1967), Amerikaans predikant en pacifis
Dolf Roks (1962), vootbaltrainer
Willem Teellinck (1579-1629), predikant en theoloog
Peter van Vossen (1968), vootballer en vootbaltrainer

Vlag en waope

Extern links

Zierikzieë monumentestad