Steenwijkerland

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan Steenwijkerland in Euverijssel

Steenwijkerland (Nedersaksisch: Stienwiekerlaand) is 'n gemeinte in de Nederlandse provincie Euverijssel, aon de grens mèt Flevoland, Friesland en Drente, mèt 'n oppervlak vaan 321,69 km² (daovaan 30,57 km² water) en (per 1 april 2016) 43.315 inwoeners. De gemeinte Steenwijkerland kump oongever euverein mèt 't historisch Land vaan Vollenhove en mèt de Kop vaan Euverijssel. Ze besjik euver de stedsjes, dörper, gehuchter en naobersjappe Baarlo, Baars, Barsbeek, Basse, Basserveld, Belt-Schutsloot, Blankenham, Blauwe Hand, Blokzijl, De Bult, De Klosse, De Kolk (gedeiltelek), De Pol, Dinxterveen, Doosje, Dwarsgracht, Eesveen, Giethoorn, Heetveld, IJsselham, Jonen, Kadoelen, Kalenberg, Kallenkote, Kuinre, Leeuwte, Marijenkampen, Moespot, Molenhoek, Muggenbeet, Nederland, Oldemarkt, Onna, Ossenzijl, Paasloo, Roekebosch, Ronduite, Scheerwolde, Sint Jansklooster, Steenwijk, Steenwijkerwold, Tuk, Vollenhove, Wanneperveen, Wetering, Willemsoord, Witte Paarden, Zuideinde en Zuidveen. 't Gemeintehoes steit in Steenwijk.

Oontstoon

De gemeinte oontstoont in 2001 oet 'n fusie vaan de aw gemeintes Brederwiede, IJsselham en Steenwijk. Brederwiede en IJsselham waore zelf fusiegemeintes, in 1973 oontstande oet de opgeheve gemeintes Blokzijl, Giethoorn, Vollenhove en Wanneperveen, respectievelek Blankenham, Kuinre en Oldemarkt. In datzelfde jaor waor ouch Steenwijkerwold bij Steenwijk gevoog. De gemeinte hètde in 't begin nog Steenwijk meh woort in 2003 umgeduip tot Steenwijkerland.

Natuur en cultuur

De gemeinte is redelek landelek meh heterogeen vaan karakter. Aon de grens mèt de Noordoospolder ligke veurmaolege vestingstedsjes en vèssersplaotse, die nao d'n aonlègk vaan de Zuiderzeewèrke vervalle zien. In 't noorde ligk 't Nationaol Park De Weerribben, e waterriek gebeed oontstande oet iewelang vervening, vaan väöl belaank veur veugel. In 't groetste deil vaan de gemeinte sprik me Stellingwerfse dialekte; in eder geval in Vollenhove en, aofhinkelek vaan definitie, meugelek ouch in ander plaotse praote ze Sallands.

Externe link

• Website vaan de gemeinte