De Ruiver

Dit artikel is gesjreve (of begós) in 't Ruivers. Laes hie wie v'r mit de versjillende saorte Limburgs ómgaon.

---

De Ruiver (Nederlands: Reuver) is de groeëtste kern van de gemeinte Bezel in Nederlands Limburg. Ouch is hie 't gemeintehoes gevestig. De plaats ligk tösse de Maas en de grens met Duitsland, ten noorde van Remunj en ten zuide van Venlo. De Ruiver haet 6.377 inweunersj (31 december 2010). ) De kern Óffebek wuuërt officieel bie de Ruiver geraekend.

De plaatsnaam zou meugelik sjtamme van Johan de Rover, 'ne ridder oet de 14e-15e ieëw. In de 16e ieëw loog hie 'ne herberg op 'n kruutsing van hanjelswaeg (Mesjtreech - Arnhem en Kölle - Antwerpe), dae men in de Roever neumde. In 1615 wuuërt de plaats geneump es up gen Reuffer. Later vindj men ónger angere aen gen Reuver, den Roover en den Ruyver.

De kerk van Ruiver is gewiejd aan de heilige Lambertus. Ze waerde tösse 1878 en 1880 gebouwd in neogotische sjtiel nao 'n ontwerp van de arsjitek Johannes Kayser. De driebeukige kruutsbasiliek mèt trapgaevels is geïnsjpireerd op de Noord-Duutse baksteingotiek. In de kerk bevinje zich 'n paar beelde oet de 15e en de 16e ieëw. De Lambertuskerk is 'n rieksmonument.

Ten oeëste van Ruiver lik de buurtsjap Ronkenstein, det 'n besjermp dörpsgezich is.

Ruiver haet sinds 1865 'n sjtasie aan de sjpaorlien Venlo - Remunj. 't Sjtasiegebouw is van 't type SS 5e klasse.

De vastelaovesvereiniging van De Ruiver het V.V. de Windjbuujels.

Nao de Ruiver is 't Reuverien, 'n aafzettingslaog oet 't plioceen geneump.

Bekende inwoëners

• Nol Wassen, dichter, (leedjes)sjriever en zanger in 't Limburgs (lid van de Ruiverse groep Dèt Môt Kénne)
• Wim Bertrams, zanger in 't Limburgs (lid van de Ruiverse groep Dèt Môt Kénne)
• Herman Bors, sjriever in 't Ruivers
• Rene Hoezen, gitarist van de Hiccups