RKC woort op 26 augustus1940 opgeriech oet 'n fusie tösse HEC, WVB en Hercules. De naom beteikent voloet 'Roomsch-Katholieke Combinatie'. In de ierste jaore veel de club nog neet hendeg op, meh dor de jaore heer wèrkde ze ziech op nao d'n top vaan 't Nederlands amateurvoetbal. In 1981 en 1982 woort RKC zelfs lendelek amateurkampioen. Me meinde toen tot d'n tied riep waor veur 'nen instap in 't betaold voetbal. Vaanaof 't sezoen 1984/85 kraog RKC Waalwijk 'n licentie. Nao e paar jaor Ierste Devisie woort de club in 1988 kampioen, wat direkte promotie nao de Ieredevisie oplieverde. Dao presteerde de club bove verwachting good, meh wisselend: noe ins haolde RKC de Intertoto Cup (1989, 1992, 2000, 2001), daan weer mós 't vechte tege degradatie.
Eventueel naocompetitie woort evels ummer euverleef, tot RKC in 2007 daan toch degradeerde. De paar jaor die drop volgde pendelde de club tösse Iere- en Ierste Devisie. Oonderwijl naome de financieel probleme touw; RKC mós e paar kier gerèd weure door de sponsore en de gemeinte. Nao de degradatie in 2014 góng RKC sportief nao de kelder: de club späölde noe oonderin de Ierste Devisie, wat sinds de professionalisering nog noets waor veurgekoume. Bij de naocompetitie vaan 2019 promoveerde de club, dat jaor achste gewore, gans oonverwach toch nao 'ne kraker tege Go Ahead Eagles.
