Naerglabbik

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Naerglabbik (Nederlands Neerglabbeek) is e dörp in de Belsj-Limbörgse gemeinte Audsberge. 't Dörp heet zoeget 900 inwoeners en ligk zjus oostelek vaan Roj, noordnoordoostelek vaan (Op-)Glabbik en zuidzuidwestelek vaan Opitter.

Historie

't Gebeed is al sinds de prehistorie bewoend; me heet hei voondste vaan de La Tènecultuur gedoon. Naerglabbik weurt in 1219 veur 't iers vermeld, same mèt zie zösterdörp, es Glatbeke tam inferioris quam superioris. glat moot hei allezeleve weure verstande es 'helder'. Naerglabbik waor klein en väöl minder belaankrieker es Opglabbik, wat daorum in de volksmoond nog ummer doorgeit veur 'Glabbik' tout court. Glabbik waor te klein veur 'n meint; keuterboere hadde eige stökskes groond. Juridisch waore ze ouch ein. 't Dörp hoort tot 't domein vaan de graove vaan Loeën, meh veel nao 1366 oonder de Bisjoppeleke Taofel vaan Luik. Oondaanks ziene geringen umvaank (nog in d'n achtienden iew had 't neet mie es 15 hoezer) had Naerglabbek wel 'n eige kèrkske, die es kwartkèrk oonder de parochie vaan Glabbik rissorteerde. Sinds 1283 had 't zienen eige preester.

Pas nao 't ancien régime greujde Naerglabbik get. In de negentienden iew woort 't 'n zelfstendege gemeinte en daobij 'n apaarte parochie. Mèt de koms vaan de mijne begin twintegsten iew begós ouch dit dörp get te greuje, al woort 't neet zoe groet wie de umringende dörper. In 1970 woort de gemeinte Naerglabbik opgeluf en touwgeveug aon Roj, wat zelf in 1977 weer opgóng in Mieëve-Roj. Sinds 2019 huurt 't bij de gemeinte Audsberge.

Beziensweerdeghede

In Naerglabbik steit nog de daartiende-iewse Hubertuskèrk (foto), zoewie get aw boerderije vaan 't Kempisch laankgeveltyp.

Gebore in Naerglabbik

Mathieu Max, componis en dirizjènt