Moersjelt

Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Se-Gietersj, es te dit dialek sjpriks.

---

Moersjelt (Nederlands: Moerslag) ies 'n buurtsjap van Se-Gietere (Sint Geertuid) gemeinte Èèsjde-Mergraote op 't plateau van Zuud-Limburg. De naam kump van moer, dat zómpetige grónd beteikent. Moersjlaag zou 'ne weeg door 'n vochtig gebeed zin. 't Gehuch, dat bove-n op 'ne berg liek, dateert oet de 14e ièw. Op 't ing van de 19e ièw ging 't bekans gans in vlamme op. Dao ies nog ein vakwerkboerderieke oet de 18e ièw euvergebleve. Dit sjteit achter 'n kapel. Dit heilig huuske ies in 1959 geboewd en later nog ins gerestaureerd. 't Mariabeeld ies gemaak door de Mestreechse beeldhouwer Frans Gast.

De paar hoezer aan de Heiweeg huère bie de parochie van Misj (Mesch).

Zuudaonzich van Moersjelt

Savelsbösj en vuursjteinmien

In de buurt bevingk ziech de Savelsbösj ('ne hellingbösj). Bie bezeukersjcentrum De Bosjrand kènne wandelaersj ziech melle en informere.

Aan de bosjrand liek ouch 't geologisch monument Moersjelt. In vreuger tieje woort hie kalksjtein of mergel gedolve um 't land en weie te bemergele (mèste). In de kalksjtein bevinge ziech vuursjtein. In de prehistorie woorte die gebruuk um d'r sjteine getuug van te fabricere. Tot in de 19e ièw maakde me gebruuk van vuursjtein um vuur te make mèt hölp van 'n tónteldoas (baanjsjotel).

In 't dörp bevinge ziech 'n paar vakantie- en kampeerboerderieje.