Hunsel

Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Hunsels, es te dit dialek sjpriks.

---

Hunsel Gewaeze gemeinte in Nederlandj
Gevörmp	1800, 1942
Opgehaeve	2007
Opgegange in	Leudaal
Provincie	Nederlands Limburg
Hoofplaats	Hunsel
Opperflaakde (bie opluffing)	34,53 km²
– daovan water:	0,13 km²
Inwoeners (kort veur opluffing)	6.187 (1-1-2007)
– deechde:	179,1/km²
Lies van börgemeisters

Hunsel is e dörp in de Nederlands-Limburgse gemeinte Leudaal.

Historie

Hunsel vörmde iewelaank - d'n tied tösse 1655 en 1711 waor dao-op 'n oetzundering - same mèt Kaesing 'n eige sjepebaank. De Franse euverheersing maakde dao 'n ind aon. Ouch in 't Keuninkriek vaan de Nederlen woort Hunsel 'n eige gemeinte, boe ouch Èl (Ell), Haalder (Haler) en Öffelse (Uffelse) bij hoorte. In 1942 woorte de gemeintes Itter (Neeritter) en Ittervoort aon Hunsel touwgeveug. Op 1 jannewarie 2007 góng Hunsel op in de nui fusiegemeinte Leudaal.

Waope

Wie de gemeinte Hunsel in 1942 woort oetgebreid, had ze zelf nog gei waope. 'tzelfde gol veur Ittervoort (al heet die gemeinte wel geperbeerd e waope aon te vraoge); allein Itter had eint. Pas op 22 december 1952 kraog de gemeinte Hunsel vaan d'n Hoege Raod vaan Adel e waope:

Doorsnoje: I. gedeild: a. vaan goud (geel) en keel (roed) vaan tien stökker, b.) in goud drei posheures vaan keel, beslage vaan zèlver (wit), gezat 2 en 1; II. in goud 'nen dobbelen adeleer vaan sabel (zwart), gebek, getongk en gepoet vaan keel.

't Boveste deil is gebaseerd op 't waope vaan Itter. De deile goud en keel stoonte dao veur 't graofsjap Loen, boe Itter bij hoort; de drei heures veur 't graofsjap Häör, wat hei laank de feiteleke mach had (zuug ouch versjèllende aander waopes in de regio, en 't huieg waope vaan Leudaal). D'n adeleer is vaan 't Voorstedóm Toear, 'n derde meugendheid in dit gebeed oonder 't ancien régime.

Historische inwoenertalle

Hunsel waor in de negentienden iew 'n kwakkelgemeinte, boevaan 't aontal inwoeners ieder aofnaom es greujde. Pas nao 1900 woort de greuj ingezat.

Jaor Aontal Greuj (gans Limbörg) 1830 1.036 -- 1840 1.077 4,0% ( 5,6%) 1849 959 -11,0% ( 4,3%) 1859 996 3,9% ( 4,4%) 1869 1.059 6,3% ( 4,5%) 1879 1.072 1,2% ( 7,0%) 1889 1.058 -1,3% ( 6,8%) 1899 999 -5,6% ( 10,2%)

Jaor Aontal Greuj (gans Limbörg) 1909 1.074 7,5% ( 17,8%) 1920 1.313 22,3% ( 32,6%) 1930 1.588 20,9% ( 25,1%) 1947 3.001 z. noot 1956 3.277 9,2% ( 27,3%) 1960 3.506 6,9% ( 7,4%) 1971 4.385 25,2% ( 13,9%)

Opmerkinge

• De ciefers tot en mèt 1930 zien zoonder Itter en Ittervoort, meh al wel mèt Èl, Haalder en Öffelse. Ter vergelieking: de drei later fusiepartners hadde in 1930 same 2.526 inwoeners. Dat hèlt veur 1947 'n stijging vaan 18,8% in, tegeneuver e provinciaol gemiddelde vaan 24,2%.
• 't Ciefer veur 1971 is op e gans vieftal aofgeroond.

Rillatief oontwikkeling vaan 1830 tot 1971

(v₁₈₃₀=100)

Greun: Gemeinte Hunsel
Leechblauw: Oetgebreide gemeinte Hunsel virtueel
Blauw: Provincie Limbörg