Halbe Zijlstra

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Halbe Zijlstra (Ooststellingwerf, 21 jannewarie 1969) is 'ne Nederlandse VVD-politicus en waor vaan 26 oktober 2017 bis 13 fibberwarie 2018 de minister vaan Boetelandse Zake in 't Kabbinèt-Rutte III. Wie bleek tot heer had geloge euver zien aonwezegheid in t boetenhoes vaan de Rössische prizzendent Vladimir Poetin, dee dao volges Zijlstra had gesproke euver zien "Groet-Rösland"-ambities, woort heer oontslage es minister en kamerlid. Vaan 14 oktober 2010 bis 5 november 2012 waor heer staotssikkertaris vaan Oonderwies, Cultuur en Weitesjap in 't Kabbinèt-Rutte I. Van 1 november 2012 bis 16 miert 2017 waor heer de fractieveurzitter vaan de VVD.

Zien partij, de VVD, vilt op Europees niveau oonder de liberaole partij ALDE. ALDE is euver 't algemein centraol-rechs, progressief en pro-EU. VVD vilt oonder de conservatievere vleugel vaan de partij, die ouch get minder EU-enthousiast is es 't groet gros vaan ALDE, zjus wie de Duitse Freie Demokratische Partei. Bis de progressievere vleugel valle de Nederlandse D66, Rienlandse Freie Wähler, 't Vlaoms Open Vld en de Waolse Mouvement Réformateur.

't Poetin-sjandaol

Veer maond nao 't begin vaan 't nui Kabbinèt-Rutte III bleek tot Zijlstra geloge had euver zien aonwezegheid bij 'n Shell-meeting in 't boetenhoes vaan de Rössische prizzendent Vladimir Poetin. Heer had ouch geloge in dat interview tot Poetin 't had gehad euver zien "Groet-Rössische" ambities 'ne staot te opriechde dee Rösland, Wit-Rösland, Oekraïne, de Baltische staote en mesjiens Kazachstan zaw motte euverkoepele. 'nen Awwe collega vaan Zijlstra leet evels weite tot Zijlstra gaaroet noets bij dat bezeuk aonwezeg waor gewees en tot Poetin 't gaaroet neet heet gehad euver dat oonderwerp. Iers leet Zijlstra weite tot heer ierder had geloge umtot heer de wèrkeleke getuige wilde besjerme dee häöm bliekelek had vertèld boe Poetin 't euver had gehad bij dat bezeuk. Heinao veurde versjèllende Rösland-köndege wijer d'n drök op, door te stèlle tot 't zier oonwoersjijnelek is tot Poetin zoen controversieel idee zou verdedege in 't opebaar, al hielemaol veur e Westers publiek in 'n periood (2006) wie de rillaties tösse Rösland en de EU nog good waore. Veurmalege Shell-topmaan Jeroen van der Veer maakde ziech vervolges bekènd es Zijlstra's bron, mer heer oontkènde tot heer 't op die wijs aon Zijlstra had vertèld. Op force vaan Van der Veer waore Poetins wäörd euver "Groet Rösland" historisch gemeind en had heer neet gesuggereerd tot heer 't groondgebeed vaan Rösland wilde oetbreie. Aon 't begin vaan 'n debat euver dees zaak in d'n Twiede Kamer, goof Zijlstra op 13 fibberwarie 2018 aon bij de Keuning zien oontslaag aon te vraoge es minister vaan Boetelandse Zake; dit woort häöm op dezelfden daag verliend. Zijlstra's ministersjap in Boetelandse Zake waor tijelek euvergenomme door D66'se Sigrid Kaag mer de portefeuille góng oetindelek nao VVD'er Stef Blok aongezeen dit ministerie waor touwbelaof aon de VVD. Zijlstra's veurgenger, oet 't Kabbinèt-Rutte II, waor PvdA'er Bert Koenders.

Brón

Nederlandstaolege versie vaan dit artikel