Gulperberg
- Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Gulpesj, es te dit dialek sjpriks.
De Gulperberg is 'nen heuvel bij Gulpe. Heer maak deil oet vaan 't Heuvelland, gans in 't bezunder vaan 't Plateau vaan Crapoel, boe 't de noordelekste kant vaan vörmp. D'n top vaan d'n heuvel ligk 157 meter bove zieniveau (zoeget 57 meter boven 't daal oet). Op d'n top steit sinds 1937 e Mariabeeld vaan Charles Vos en Piet Gerris. Bovenop de berg ligk ouch 't gehöch Berghem, zoewie 'n camping die terrasvörmeg tege de flaank is aongelag.
Fietsrenne
[bewirk | brón bewèrke]De Gulperberg is populair bij fietsrenners, zoewel amateurs es profs. Me kin vaan drei kante de berg beklumme. De gemekelekste beklumming is via de Landsraoderweeg. Me beklump daan de zuidweskant, in de volksmoond bekind es de 'Keuning vaan Spaanje'. De gemiddelde helling is 4,6%, meh 't gief tegen 't ind e stökske boe me 11% moot fietse.[1] Via 't noordweste, dat wèlt zègke vaanoet 't dörp euver de Gulperbergweeg, is väöl korter en väöl steilder. Me begint daan mèt wel 16%, al vlaak dat nao 200 meter hendeg aof en kump de ganse beklumming op gemiddeld 8,2%.[2] Meh kin ouch nog vaanoet 't ooste, vaanoet Partij de berg op. Dat is alles bijein de zwoerste beklumming, umtot de hèlling al vreug nao de 10% geit en nao 't ind touw nog touwnump tot 14%.[3]
Mountainbikers numme soms de Aw Gats, e zandpeedsje boe me de Keuning vaan Spaanje mèt aofsnijt.[4] Dit is hendeg steil en neet veur gewoen fietse gesjik.
Vaanoet 't zuie vèlt de berg neet te beklumme, umtot dao 't plateau doorlöp nao Heieret en wijer.
De hèllinge vaan de Gulperberg, in 't bezunder die vaanoet Partij, weure dèks beklomme in d'n Amstel Gold Race.