Berg (Keer)

Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Keersj, es te dit dialek sjpriks.

---

Berg (Nederlands: Berg) ies 'n buurtsjap van Keer in de gemeinte Èèsjde-Mergraote op 't plateau in Zuud Limburg. Tot 1970 huèrde-n 't gedeiltelik bie de gemeinte Hièr. De buurt ies gelege op en rónd de Hièrderberg /Keerderberg en rónd de Pater Kustersweeg. In 2007 woonde d'r 160 luuj.

Bezeenswaerdig

• Aan de Pater Kustersweeg liek 't veurmalig katholiek sanatorium veur drankzuchtige oet 1915. 't Ies 'n rieksmonument nao 'n óntwerp van architect N. Ramakers oet Zittert.
• Ouch aan deze weeg sjteit op de hook 'n weegkruus, ter naogedachtenis aan Christiaan Servaes Schrijnemaeckers, dae hie veróngelukde op 18 december 1840. Op 't kruus sjteit de teks: Eenen opregten dinaer van God. Hij was geenen Dronkkar of Godslasterar.
• In de buurt sjteit ouch 't Hoes Sint Gerlach, oats 'n sanatorium, tegewoordig 'n vergadercentrum en gashoes veur de patersj van 't Heilig Hart van Jezus. Biebehuèrend bevinge ziech lièger aaf de geboewe van de technische sjoal.
• Internaat Sint Joep ies 'n sjoal veur speciaal ónderwies.
• Oorlogsmonument door de beeldhouwer Jean Weerts oet Mesjtreech veursjtèllende 'n sjteine beeld van drie soldaote mèt 'n vaan geflankeerd door de Vlaamse lièw.
• Derepark (hertekamp) bie Hoes Sint Joep.
• De Nuuj Sint Jozef-groeve en de Sjaanderberg zint veurmalige kalksjteingroeves woa de mergel gewonne woort veur o.a. de boew van Hoes St. Joep. In de Twiède Waereldoorlog höbbe ze es sjoelkelder deens gedoon. Allewiel zint ze ingeriech es natuurreservaat veur euverwinterende vleermuus.