Nicolaus Heyendal
Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.
Nicolaus Heyendal (Wale, Astenet, 1 september 1658 - Rolduc, 5 mei 1733) sjtamt oet 'n familie van sjaeëpene en klaerke an de hoeëgbaank Wale in 't Hertogdom Limburg. Die familie tèlt väöl juriste en gèsseleke. Wie bekaans alle Limburgers, die zich an de weitesjap wèjde bezóch ooch Nicolaus 't Gymnasium Marianum van de Jezuïete in Aoke. Nao z'n eindexame vör 't gymnasium reesde e nao Roeëme öm dao z'n sjtudie aaf te make. Oonderwaegs waoërt-e evvel gevange genaome dör Venetiane, tösje de soldaote gezat en nao Corfoe gesjikt, oeë e zich 't Grieks lieërde. 't Gelökde 'm te vluchte en in Milaan te kaome, oeë e lès kraeg in d'r retorica en Italiaans lieërde.
Leuve
[bewirk | brón bewèrke]Wie e truuk kieërde nao heem, kieëm e in Wale aa óp d'r daag dat me vör de doeëdgewaande 'n dèns heel. Dae dèns zów e ha biegewónd. Va Wale góng e nao de universiteet va Leuve öm theologie, m.n. canonisch en börgerlek rech en ow tale te sjtudere. Heyendal sjaen 'ne brillante sjtudaent te zieë gewes mèt 'n enorm geheuge. E zów 't gaans Nuuj Testamaent en groeëte dele van 't Aod Testamaent va boete ha gekaand.
Rolduc-Eupe-Rolduc
[bewirk | brón bewèrke]Naodat e de universiteet verlaote how trooj e in 1684 es novice in in de Augustinerabdij Rolduc, oeë d'r Aokener Johann Bock d'r abt waor. In dis abdij heersjte e sjtudieklimaat en Heyendal besjtudeerde Augustinus en Thomas van Aquino. In 1685 laet e zieng gelofte aaf. Naodat e zieng theologische sjtudies aafgemakd how, beneumt d'r abt 'm in 1694 es pesjtoeër va va Eupe. De rigoristische meneer oeëóp e óptrooj taege wanorde bezörgde 'm dao väöl vijande en in de driej jaor dat e dao wèrkde zówwe versjèjje moordaansjlaeg óp häöm beraamd zieë. Ooch how e ömmer oonènigheed mèt de Capucienermonnikke, oeë Heyendal 'n bedreiging van zieng positie in zoog mae die bie de luuj va Eupe hieël geleefd waore. Óp vraog van d'r preensbisjop va Luuk, oonder wiens bisdom Rolduc en Eupe kèrkelek vele, reep d'r abt Bock Heyendal in 1697 truuk en versjafte 'm 'ne poos es professor in de theologie.
Nao d'r doeëd van Bock, vólgde Heyendal 'm óp mae dat sjaen neet zoonder sjlaag of sjtoeët te zieë verlope. (Toegewijd an de dienst van God, LGOG, blz 113 - 152, Hub Franssen, De omstreden benoeming van Nicolaas Heyendal tot abt van Kloosterrade (1712)).
Heyendaal zat vanaaf 1685 d'r Annales Rodenses wieër mèt d'r Continuatio.