Variola

Un xica con variola en Bangladex en 1973

Variola ia es un maladia infetante causada par la virus variola, cual parteni a la jenero Orthopoxvirus. La caso natural aveninte ultima ia es diagnoseda en otobre 1977, e la Organiza Mundal de Sania (OMS) ia serti la elimina global de la maladia en 1980, fasente variola la sola maladia umana cual on ia elimina asta oji.

La sintomes inisial de la maladia ia inclui febre e vomita. Esta ia es segueda par la formi de ulseras en la boca e un eruta. Tra alga dias, la eruta ia muta a bulas plenida con licuida e con un indente a la sentro. Alora la bulas ia crosti e ia cade, lasante sicatrises. La maladia ia sperde de un person a un otra prima par contata longida con fas a fas con un person infetada o (rara) par ojetos contaminada. On ia ateni la preveni xef par la vasin contra variola. Pos cuando la maladia ia developa, alga medisines antivirusal ta pote aida, ma tal medisines no ia deveni disponable asta pos cuando on ia elimina la maladia. La risca de mori ia es sirca 30%, con tasos plu alta entre bebes. Frecuente, los ci ia survive ia ave multe sicatrises sur sua pel, e alga ia sieci.

La atestas la plu temprana de la maladia data a sirca 1500 AEC en momias ejiptian. La maladia ia aveni istorial en epidemicas. En la sentenio 18 en Europa, on estima ce 400 000 persones ia mori de la maladia per anio, e ce un tri de tota casos de siecia ia es par causa de variola. On estima ce variola ia mata tan multe como 300 milion persones en la sentenio 20 e sirca 500 milion persones en la 100 anios final de sua esiste. Moris plu temprana ia inclui ses monarcas european, incluinte Luis 15 de Frans en 1774. An en 1967, 15 milion casos ia aveni per anio.

Inocula per variola pare ia comensa en Xina sirca la desenio de 1500. Europa ia adota esta pratica de Asia en la dui prima de la sentenio 18. En 1796, Edward Jenner ia introdui la vasin moderna contra variola. En 1967, la OMS ia intensi laboras per elimina la maladia. Variola es un de du maladias infetante cual on ia elimina, la otra es pesta boval (un maladia de ungulatos con cuantia duable de ditos) en 2011.