Sodio

Sodio es un elemento cimical con la numero atomal 11 e la simbol Na (de la latina natrium - multe otra linguas usa lo, o varias como natrio, per sodio). Lo es un metal mol, blanca arjentin, u multe reatante. Lo es un metal alcalin de grupo un, car lo ave sola un eletron en sua orbita plu esterna, cual lo dona fasil, creante un ion cargada positiva, pd la Na carion. Sua sola isotopo stable es 23Na. La metal libre no aveni en natur, e debe es preparada de composadas. Lo es la elemento ses la plu comun en la crosta de la tera, e esiste en multe minerales, como feldspato, sodalito, e la sal NaCl. Multe sales de sodio es multe disolvable en acua: iones de sodio ia es lixivia par la ativa de acua de la minerales sur tera tra eones, e alora, sodio e cloro es la elementos la plu comun par pesa disolveda en la mares.

Sodio ia es prima isolida par Humphry Davy en 1807 par eletrolise de idrosido de sodio. Entre otra composada usosa con sodio, idrosido de sodio es usada en la produi de sapo, e clorido de sodio (pd sal comable) es un modo de dejela e un nurinte per animales e umanas.

Sodio es esensal per tota animales e alga plantas. Iones de sodio es la cation major en la licuida estraselulal (LES), e como esta es la contribuinte major a la presa osmosal de LES el la volum comparte de LES. Perde de acua de la comparte FES crese la consentra de sodio, un situa nomida ipernatremia. Perde isotonical de acua e sodio de la comparte pote resulta en un situa nomida LES ipovolemia.

Par la funsiona de la pompa sodio-potasio, selulas vivente de umanas pompa tre iones de sodio a estra de la selula per du iones potasio pompida a en. Compara la consentras de iones tra la membrana de selulas, de interna a esterna, potasio mesura sirca 40:1, e sodio sirca 1:10. En selulas de nervos, la carga eletrica tra la membrana de selulas capasi transmete de la impulsa neuronal - un potensial movente - cuando la carga es disipada. Sodio ave un rol clavin en acel ativia.

Sodio es un metal lejera e arjentin. Lo es tan mol ce lo pote es fasil cortida con un cotel. Cuando lo es cortida, la surfas va deveni blanca tra tempo. Esta es car lo reata con aira per formi idrosido de sodio e carbonato de sodio. Sodio es alga plu lejera ca acua, e cuando lo reata con acua, lo flota. Esta reata es multe rapida. Idrojen e idrosido de sodio es produida, e la idrojen pote ensende. Car sodio fonde a un temperatur basa, lo fonde cuando lo reata con acua. Comparada con otra metales alcalin, sodio es tipal min reatante ca potasio e plu reatante ca litio.

Composas de sodio

Composas de sodio es multe importante per produis comersial, spesial per industrias cual produi vitro, paper, sapo, e stofas. La composas de sodio la plu importante es sal de table (NaCl), carbonato de sodio (Na2CO3), bicarbonato de sodio (NaHCO3), idrosido de sodio (NaOH), nitrato de sodio (NaNO3), fosfato de disodio (Na2HPO4), fosfato de trisodio (Na3PO4), tiosulfato de sodio (Na2S2O3·5H2O), e borax (Na2B4O7·10H2O). Plu:

Amida de sodio – alcalin multe forte;
Arsenito de sodio – un solida sin color, multe nosiva;
Arsenato de sodio – un ajente osidinte, multe nosiva;
Azida de sodio – usada en cuxines de securia;
Bicarbonato de sodio – soda per forni, usada en coce;
Bismutato de sodio – un ajente osidinte, usada per testa per manganes;
Bisulfato de sodio – un asida, usada per crese pH;
Borato de sodio - borax, usada en deterjentes, cosmeticas, antifungales, e insetisides
Bromato de sodio – un ajente osidinte, usada per tinje capeles;
Bromido de sodio – rara, usada en alga medisin;
Carbonato de sodio – usada per fabrica vitro;
Clorato de sodio – usada en alga esplodentes;
Clorito de sodio – usada en desinfetas;
Clorido de sodio – sal de table;
Cromato de sodio – jala, un ajente osidinte, nosiva;
Dicromato de sodio – orania, ajente osidinte, nosiva;
Fluorido de sodio – usada en pastas de dentes, amarga, nosiva en cuantias grande;
Idrosido de sodio – alcalin forte e corodente, usada en sapo;
Ipoclorito de sodio – blancinte, desinfetante;
Ipofosfito de sodio – ajente reduinte, venenosa;
Iodato de sodio – ajente osidinte, preveni nonsufisi de iodo;
Iodido de sodia – ajente reduinte debil, preveni nonsufisi de iodo;
Manganato de sodio – solida verde rara;
Nitrato de sodio – usada en polvo per esplodentes;
Nitrito de sodio – usada en conserva de comedas;
Periodato de sodio – ajente osidinte;
Permanganato de sodio – ajente osidinte, min comun ca permanganato de potasio;
Fosfato de sodio – usas diversa;
Fosfido de sodio – catalisente;
Fosfito de sodio – ajente reduinte, nosiva;
Selenato de sodio – ajente osidinte forte;
Selenido de sodio – ajente reduinte forte, reatante;
Selenito de sodio – ajente osidinte debil, vitamina aumentante;
Sulfato de sodio – amarga, laxinte;
Sulfito de sodio – ajente reduinte debil, usada per conserva comedas secida
Telurato de sodio – ajente osidinte forte;
Telurido de sodio – ajente reduinte forte, reata fasil con aira;
Telurito de sodio – la composa xef de telurio.